Geir Kvarme, Ingeborg S. Raustøl og Ola G. Furuseth er fast tilsette ved Det Norske Teatret

I dag beslutta teatersjef Erik Ulfsby å gi fast tilsetjing ved teatret til skodespelarane Geir Kvarme, Ingeborg Sundrehagen Raustøl og Ola G. Furuseth.

- Det er ei stor glede å fortelje at teateret i dag har tilsett tre nye skodespelarar. Geir, Ingeborg og Ola er tre sterke skodespelarar som vil bidra til å styrke den fast tilsette delen av ensemblet, seier teatersjef Erik Ulfsby om tilsetjingane.

Geir Kvarme (54) er utdanna ved Statens Teaterhøgskole og har tidlegare vore knytt til Trøndelag Teater, Nationaltheatret og Olso Nye Teater. Han hadde sitt gjennombrot som skodespelar i rolla som ungguten Tommy i laurdagsunderhaldninga Fredrikssons Fabrikk på NRK på byrjinga av 90-talet, og har sidan også vore å sjå i andre seriar som Nr. 13 og Off-Shore. På Det Norske Teatret har han mellom anna vore med i Jungelboka og Sweeney Todd, og er for tida å sjå i Det merkelege som hende med hunden den natta, Jakob og Neikob og Sju dagar i august. Kvarme sit også i Kultur- og utdanningskomiteen i Bystyret for Oslo Høgre.

Ingeborg Sundrehagen Raustøl (37) var ferdig utdanna frå Statens Teaterhøgskole i 2010. Før dette hadde ho etablert seg i norske TV-sjåarars bevisstheit gjennom rolla som May Halvorsen i TV2-serien Hotel Cæsar og som programleiar i NRK barne-TV. Dei seinare åra har ho mellom anna medverka i TV-seriane Maniac (nominert som beste kvinnelege hovudrolle ved The Monte Carlo Television Festival) på TV2 og Elven på TV3, i tillegg til filmane Snekker Andersen og Julenissen og Høst. Sidan ho var feridg utdanna som skodespelar, har har Raustøl vore knytt til Det Norske Teatret og spelt i mellom anna Spelemann på taket, Evita, Ulovleg norsk og Bibelen. Ho er for tida å sjå i Åstaddikting på Scene 3.

Ola G. Furuseth (41) har si utdanning frå Arts Educational Schools i London, og har sidan endt utdanning vore knytt til Trøndelag Teater, Oslo Nye Teater og dei seinare åra til Det Norske Teatret. Han er kjend frå TV-seriane Seks som oss på TV2 i tillegg til Halvbroren og Kampen for tilværelsen på NRK. Her på teateret har han mellom anna spelt Håkon Magnus i Halve Kongeriket - the Musical og vore med i framsyningar som Stort og stygt, Vi som føler annleis og Herr Marmelade. Furuseth er for tida å sjå i Inkognito på Scene 3, samt rolla som Frøy i Robert Wilsons Edda på Hovudscenen.

- Vi ser at det for tida går føre seg ein debatt i Operaen om faste kunstnarstillingar. Det Norske Teatret er tilfreds med ordninga vi har med Norsk Skuespillerforbund, og kjem til å oppretthalde den noverande delen faste skodespelarstillingar ved teateret. Grunna naturleg avgang i ensemblet vil det det komme fleire tilsetjingar i åra framover, seier Erik Ulfsby.