Skip to main content

Forfattar Jan Roar Leikvoll er død

Pressemelding   •   aug 01, 2014 15:52 CEST

Det var med stor sorg vi i Samlaget fekk melding om at Jan Roar Leikvoll har gått bort. Det skjedde brått og uventa. Dødsårsaka er ikkje kjend enno, men Leikvoll var open om at han levde store delar av livet med ein hjernesvulst som aldri vart borte.
 
Leikvoll var frå Frekhaug i Nordhordland og gjekk på Skrivekunstakademiet i Hordaland. Han debuterte på Det Norske Samlaget i 2008 med den kritikarroste romanen Eit vintereventyr. Romanane Fiolinane (2010), Bovara (2012) og Songfuglen (2013) stadfesta han som ei av dei sterkaste og mest særprega stemmane i ny norsk litteratur.
 
Bøkene til Leikvoll er kjenneteikna av eit brutalt, rått, men samstundes vakkert og kjenslevart språk, der yttergrensene for menneskeleg erfaring blir portrettert med nådelaus realisme.
 
For romanen Fiolinane fekk Leikvoll Nynorsk litteraturpris og same bok blei nominert til Kritikerprisen og Ungdommens kritikerpris. I 2010 blei han tildelt Sigmund Skard-stipendet og Bjørnsonstipendet.
 
For dei tre første romanane mottok han i 2013 både Bokhandelens forfattarstipend og den prestisjetunge prisen Stig Sæterbakkens minnepris. Juryen for sistnemnde pris uttalte: «Hans foreløpige forfatterskap er et av de mest gjennomførte og unike prosjektene i norsk samtidslitteratur.»
 
Den store, stillferdige mannen, som skreiv så omsynslaust, men samstundes hjarteskjerande vakkert om livet sjølv, har gått bort. Jan Roar Leikvoll vil bli djupt sakna.

Det Norske Samlaget er eit kultur- og kunnskapsforlag som gir ut litteratur på nynorsk. Vi gir ut omlag 100 titlar kvart år av norsk og omsett skjønnlitteratur, barne- og ungdomsbøker, dokumentar- og faktalitteratur, ordbøker og læremiddel for høgare utdanning.

Kommentarer (1)

    Så stig da i meg, einsemd,
    storm mitt jordlivs siste skanse
    og øyd min tæringsdraum om lykke her.
    Du avgrunnssvimre jord,
    ver du ei onnor verd,
    gjev all din løyndom
    i denne gjennomlyste morgonstund,
    i denne timen føre dødsens store dag
    når einsemdrøyster ropar meg attende
    til atterføding or ein annan grunn.

    No stormar all mi einsemd mot si grense.
    Mitt liv var draum forutan dagklår visse
    og difor eig eg ikkje jorda meir -
    Men livet skal eg aldri, aldri misse -

    - Tor Jonsson

    - Kim Rio - 02-08-2014 03:10 CEST

Legg til kommentar

Kommentar

Agree With Privacy Policy