Fersk Ibsenprisvinnar som digital oppleving

Mare av Lisa Lie blei kåra til den store kultklassikaren da framsyninga hadde urpremiere på Scene 2 i 2019. No har framsyninga nett vunne den nasjonale Ibsenprisen for beste scenetekst, og i det høvet blir framsyninga tilgjengeleg i ein digital versjon frå videoarkivet. 

FREDAG 24. APRIL KL. 20.00
I EI STOVE NÆR DEG på våre nettsider
Framsyninga blir liggande på våre nettsider ei stund framover
Vi gjer merksame om at dette er eit opptak av framsyninga, ikkje framsyninga.

Mare er ein tittel som gir mange assosiasjonar. Mare som i mareritt. Mare som i hav. Utgangspunktet for framsyninga er morskjærleiken, og kva drivkrefter denne skapar i kvinnene som blir til mødrer. Spesielt dei mørke kreftene.

Lisa Lie: Eg har lenge vore fascinert av kva som driv mødrer som drep barna sine. 

Urkrefter
For å finne svar har ho leita både mellom historiske kvinneskikkelsar som Magda Goebbels, men også i mytiske skapnader som Medea frå gresk mytologi og mara frå den norske - som slettes ikkje er ei mor, men ein form for kvelardemon. Og visst kan morskjærleiken vere kvelande.

Når Lisa Lie går laus på tematikken er det med overraskande mykje humor.

Markant regissør
Regissør Lisa Lie er ein av våre mest spennande regissørar, og har lenge prega det norske teaterlandskapet. Mare er hennar første framsyning ved Det Norske Teatret, og blei allereie ved premieren spådd av Aftenpostens meldar å bli ei kultframsyning. Saman med skodespelarane, scenograf og resten av det kunstnarlege teamet skapte ho eit eige univers der konvensjonelle reglar og logikk er oppheva. Her har populærkulturen ein like naturleg plass som dei greske gudane. Det er som om det heile spring ut frå ei slags «ursuppe», ei gryte, der scenen renn over av fargar, mytar, referansar og ord. Det heile er like underhaldande som det er skremmande.

Les meir om Mare på våre nettsider.