Hans og Grete gratis - og med ein vri

Når Det Norske Teatret set opp det kjende eventyret om Hans og Grete, er hovudpersonane Frans og Merete. Dei har ikkje råd til godteri eller gåver til jul. Men framsyninga - den kan publikum sjå gratis*.

HANS OG GRETE
basert på eventyret av brørne Grimm
PREMIERE TORSDAG 16. NOVEMBER KL. 18.00
SCENE 3

Det er fargesprakande, skakt og humoristisk når Scene 3 blir åstad for Frans og Meretes eventyrlege jakt på skattekista til heksa i eventyret. Dei har nemleg overhøyrt mora snakke med ei venninne i telefonen, og ho klaga si naud over at den vesle familien ikkje har råd til julemiddag eller gåver til jul. Så da tenkjer Frans og Merete at det vel må vere lov til å stele litt frå ei slem heks?

Som sagt, så gjort. Frans og Merete dreg ut for å finne heksa og stele skatten hennar. Vegen til heksehuset blir som ein både skummel og fantastisk draum, og når dei får sjå det bugnande godteskåpet hennar, gløymer dei all fornuft

Dyrtid

Regissør Charlotte Frogner har i samarbeid med ensemblet improvisert fram denne versjonen av eventyret, som tek utgangspunkt i Hans og Grete. Vi møter ein liten familie på tre, aleinemora Gry og barna Frans og Merethe. Dei er ein vanleg familie som er vane med å klare seg, men no gjer dei auka utgiftene alt vanskelegare, nett slik det faktisk er for mange familiar i desse dyrtider

*=«Alt er gratis*»

Framsyninga Hans og Grete er ein del av «Alt er gratis*»-perioden på Scene 3 som strekker seg fram til nyttår.