Populært Gardekurs

Mange unge musikantar vil prøve seg som musikkgardist, men under halvparten av dei som søkte om å få plass, får vere med på kurset. Gardekurset er for korpsmusikantar i alderen 16 – 19 år. Dei 60 deltakarane kjem frå heile landet.

- I år var det veldig mange som søkte om å få delta. Korpset skal ha janitsjarbesetning med 60 musikantar inkludert 6 signaltrommer. Uttak går på musikalske kvalifikasjonar, og korpsmusikantar som har delteke på NMFs sommarkurs har fått prioritet, seier nasjonal produsent Berit Handegard.

Kurset er frå 13. august – 19. august i Husebyleiren i Oslo. Det blir ei veke med drill og musikk med Hans Majestet Kongens Gardes musikkorps.

Søndag blir det konsert og drilloppvisning saman med 3. Gardekompani (Gardemusikken) i leiren kl. 1400.

Prosjektet er eit samarbeid mellom Norges Musikkorps Forbund og HMKG.