Pressemelding -
Festkveld for Hans Børli
8. desember 2018 er det 100 år siden Hans Børli (1918–1989) blei født. Den offisielle avslutninga på jubileumsåret for den folkekjære lyrikaren er ei festframsyninga på Det Norske Teatret 4. desember.
BØRLI 100 ÅR
TYSDAG 4. DESEMBER KL 20.00
HOVUDSCENEN
Børli har gjerne blitt kalla «skogens diktar», fordi han hentar mange av motiva sine frå skogen og arbeidde som tømmerhoggar heile livet, men denne merkelappen hadde han sjølv eit ambivalent forhold til. Han hevda at overgangen til motorsag i femtiåra forandra inspirasjonen hans. Motorlarmen og effektivitetsjaget øydela kontakten med naturen.
Det store i det vesle
Gjennom jubileumsåret har fleire peika på dei eksistensielle problemstillingane som han set lys på gjennom diktinga si. Børli viser det store i det vesle. Dikta er ofte opne og undrande. Kanskje er det derfor så mange les Børli i dag?
Festframsyninga blir ei blanding av dikt, tonesette dikt og betraktningar. Åse Kleveland er konferansier, og med seg på scena får ho blant andre Anne Marit Jacobsen, Sinikka Langeland, In The Country med Frida Ånnevik, Georg Buljo, Camilla Granlien, Erik Lukashaugen, Bjørge Verbaan, Ane Dahl Torp, Sjur Miljeteig, Vidar Sandem, Sverre Eier, Sigbjørn Johnsen og Mímir Kristjánsson.
Meir om festframsyninga finn du på heimesida til Det Norske Teatret
Emner
Kategorier
Det Norske Teatret er Noregs største teater for refleksjon, oppleving og underhaldning. Teateret ligg sentralt i hovudstaden i eit moderne teaterbygg frå 1985 med 3 faste scenar, og over 220.000 publikummarar årleg.
