Pressemelding -
Musikklinjekoret og Opera Nordfjord klare for turné
Romantiske operasvisker og storslagen messe
Etter fleire månader med intense korøvingar er både Musikklinjekoret på Firda og operakoret til Opera Nordfjord snart klare for Puccini-turné i fylket. Onsdag føremiddag er orkesteret på 40 musikarar på plass til første øving i Trivselshagen, og etter kvart kjem både tenoren Evan Bowers og bassen Magne Fremmerlid og gjer ensemblet komplett.
Alle medverkande gler seg til den siste, inspirerande innspurten, når alle endeleg er samla, og Puccini sin vakre musikk får den siste finpussen saman med dirigent Michael Pavelich. Programmet er todelt, med kjende operautdrag frå La Bohème, Manon Lescaut, Madama Butterfly og Tosca i første avdeling og det storslagne korverket Messa di Gloria. Den vakre messa låg vekkgøymt frå premieren i 1878 til den vart gjenoppdaga i 1952, og no får publikum ein unik sjanse til å høyre dette verket, som aldri har vore framført i fylket før.
Opera Nordfjord garanterer høg gåsehudfaktor når unge korstemmer blandar seg med vaksne, erfarne koristar og profesjonelle solistar og musikarar.
Publikum kan oppleve konserten i Trivselshagen på Sandane fredag 24. mars, i Operahuset Nordfjord laurdag 25. mars og i Førdehuset søndag 26. mars.
Emner
Regions
Opera Nordfjord vart starta i 1998 etter idé frå Kari Standal Pavelich og ektemannen Michael Pavelich, som framleis er sentrale i administrasjon og kunstnarisk leiing. Distriktsoperaen har sidan starten hatt store årlege operaproduksjonar på Nordfjordeid, takka vere omfattande dugnadsinnsats av ca. 200 frivillige. I tillegg til hovudproduksjonen om hausten turnerer Opera Nordfjord med eit nytt konsertprogram kvar vår til konsertstader på nordvestlandet. Samarbeid med andre aktørar står sentralt i operaen sitt virke, Eid vidaregåande skule er fast samarbeidspart i produksjon av kulissar og rekvisittar kvar haust, og Musikklinjekoret ved Firda vidarergåande skule har jamnlege konsertsamarbeid om våren. I tillegg er det eit utstrakt samarbeid med andre distriktsoperaer og Den Norske Opera & Ballett gjennom samproduksjonar eller utleige/lån av delproduksjonar. Familieproduksjonen vart innført i 2013 med balletten Nøtteknekkaren. Sidan har både The Sound of Music og Du er god, du, Charlie Brown fått god mottaking av publikum. Fast spelestad er Operahuset Nordfjord på Nordfjordeid, og administrasjonen har kontorstad i ærverdige Gamlebanken i Eidsgata.