Atle Hansen aktuell med ny ungdomsgrøssar

Eg har venta på deg er siste tilskot til Grøss og gru-serien.

Simon gler seg til å ro ut for å fiska. Men kven er det som plutseleg ropar på han? Er det den mystiske jenta han møter på kafeen? Ho folk seier han skal halda seg vekke frå? Eller er det Den svarte enka? Ho som sit på stranda og ventar på kjærasten som forsvann på havet for lenge sidan?

Eg har venta på deg er ei lettlest og drivande forteljing om tenåringen Simon, som er ny i ei bygd der alle kjenner alle – trur han.

Boka er del av ungdomsserien Grøss og gru, ein serie utvikla i samarbeid med Leser søker bok, der forfattarar som Laura Djupvik, Lars Mæhle og Linn T. Sunne tidlegare har bidrege med gyselege grøssarar.

Atle Hansen (f. 1954) er forfattar, musikar og journalist. Han har skrive bøker for både barn og vaksne, gitt ut fleire plater og fått Vinjeprisen for nynorsk journalistikk. Han debuterte i 1997 med barneboka Sjørøvar-Jenny og Einauge-Bill. Han er kanskje mest kjent for spenningsbøkene han har skrive for barn og unge, som Skatten i Skutevika (2007), Fangar i natta (2008), Den svarte oksen (2009) og Svartedalen (2015). Hansen kjem frå Mosterhamn, men bur på Stord.