Beyonces favorittpoet, kritikarroste Warsan Shire, no omsett til norsk

Den kenyanskfødde, britisk-somaliske poeten Warsan Shire (f. 1988) tok verda med storm med diktsamlinga Eg lærer mor mi å føde i 2011 – også superstjerna Beyonce, som siterer Shire på albumet Lemonade frå 2016. 28.2. lanserer Samlaget diktsamlinga på norsk. 
​
​Boka er ein hyllest til familien, som måtte flykte frå heimlandet. Dikta teiknar bilde av krigsherja landskap med omstreifande militsgjengar og liv levde i frykt og terror. Shire konfronterer lesaren med menneske tvungne til å forlate heimane sine og tanken om at ingen er trygge om katastrofen skulle inntreffe – heller ikkje i Vesten.
​
​​Kroppen er eit viktig motiv – først og fremst kvinnekroppen – og valden som blir utført mot han, både i og utanfor heimen. Ved å hevde fullstendig eigarskap over eigen kropp proklamerer Shire at ho, trass systematisk undertrykking, rasisme og brutalitet, ikkje vil la seg kue. 
​
​​«Eg har munnen til mor mi og auga til far min: I ansiktet mitt er dei framleis saman»
​
​​Samlinga er gjendikta frå engelsk av Camara Lundestad Joof og Kristina Leganger Iversen.
​
​​Warsan Shire (f. 1988) er ein prisvinnande britisk poet, redaktør, aktivist og lærar, fødd av somaliske foreldre i Kenya. Poesien hennar er blitt omsett til ei rekke språk.​