Maria Parr og Marit Kaldhol nominerte til verdas største barnebokpris, ALMA-prisen

Marit Kaldhol og Maria Parr er begge nominerte med sin samla forfattarskap.Kaldhol har vore nominert til ALMA-prisen to gonger før.

Marit Kaldhol (f. 1955) har sidan debuten i 1983 gitt ut ei rekkje prislønte bøker for barn, ungdom og vaksne.  Forfattarskapen hennar er rik og variert. Kaldhol har fått fleire internasjonale barneprisar for biletboka Farvel, Rune (1986). Boka er blitt ein klassikar innanfor biletboksjangaren, og er omsett til tolv språk og m.a. utgitt i Japan, USA og Canada. Dette gjer ho til den norske biletboka som har fått aller størst internasjonal merksemd. 

Marie Parr (f. 1981) debuterte med Vaffelhjarte i 2005, og fekk sitt store gjennombrot med Tonje Glimmerdal i 2009.  i 2017 kom Keeperen og havet. Bøkene til Parr kjem ut over heile verda, og ho har også vunne ei rekkje internasjonale prisar. Ho har blitt samanlikna med både Johanna Spyris (Heidi) og Astrid Lindgren. 

Litteraturprisen til Astrid Lindgrens minne vart oppretta i 2002, og er verdas største barne- og ungdomslitteraturpris. Prissummen er fem millionar svenske kroner.

Prisen er internasjonal og blir årleg delt ut til ein eller flere prisvinnarar uavhengig av språk eller nasjonalitet. Forfattarar, illustratørar, forteljarar eller lesefremmande arbeid kan motta prisen.

Formålet med prisen er å styrke og auke interessa for barne- og ungdomslitteratur i verda. Basen for arbeidet er FN sin barnekonvensjon om barn sin rett til kultur.

Prisvinnaren blir kåra av ein jury som tek imot nomineringar frå heile verda, og blir offentleggjort den 2. april 2019. Prisen blir administrert av Statens kulturråd i Sverige. 14 norske forfattarar, illustratørar og ei foreining for leselyst er blant dei til saman 246 kandidatane frå 64 land som er nominerte til prisen.