Hør her´a blir leikent forteljarteater

Småfrekk, fornøyeleg, sjarmerande og forfriskande. Lovorda har hagla over Gulraiz Sharifs roman Hør her’a etter utgjevinga hausten 2020. Den kritikarroste ungdomsromanen frå 2020 har alt rukke å bli kinofilm, og no skal denne sjarmerande feelgoodforteljinga frå ein norsk-pakistansk familie på Oslos austkant bli teater.

HØR HER´A
av Gulraiz Sharif
URPREMIERE FREDAG 9. FEBRUAR KL. 19.30
SCENE 2

Mahmoud veks opp i ei blokk på Oslos austkant. Her bur han med faren, som køyrer taxi heile døgnet, mora, som vaskar på universitetet og klaskar han med sandalen om han gjer noko gale og veslebroren, som likar å sjå My Little Pony på Youtube. Sjølv likar Mahmoud best å henge i lag med kompisen, Arif. Dei undrar seg over alle dei rare tinga potet-nordmennene finn på, som å dra på hytte med utedo når dei skal kose seg. Men denne sommaren har familien lagt andre planar for Mahmoud. Han skal nemleg vise onkel Ji frå Pakistan rundt i Oslo. Onkelen blir mildt sagt overraska og forført av det han ser. Likevel er det veslebror Ali det vil handle mest om. Det viser seg at han ikkje berre likar å sjå hestevideoar på skjermen, men også vil kle seg som ei jente, noko som blir svært vanskeleg å svelge for den norsk-pakistanske familien.

Ungdomsroman med suksess

Forfattar Gulraiz Sharifs pangdebut fekk stor merksemd og han blei omtalt som det friskaste pustet i bokhausten 2020. Fleire prisar, nominasjonar og ein spelefilm seinare er romanen no også dramatisert og klar for teaterscenen. I teaterversjonen av Hør her´a har regissør Toril Solvang-Kayiambakis vald å dyrke teaterformen og ikkje gå kinofilmen i næringa.

- Vi skal lage teater, ikkje film. Og vi skal heller ikkje gi att ei bok. Vi vil bort frå det realistiske og over i det teatrale, forklarar regissøren. Les heile artikkelen.