Pressemelding -
Jonas Benyoub teaterdebuterer i Da vi var yngre
Berre 19 år gamal entra Oliver Lovrenski den litterære scenen med romanen Da vi var yngre. No blir boka teater, og med det debuterer også Aksel Hennie som teaterregissør. Hovudrolla som Ivor blir spelt av rappar Jonas Benyoub, som også erobrar teaterscenen for første gong.
DA VI VAR YNGRE
av Oliver Lovrenski
URPREMIERE FREDAG 28. FEBRUAR KL. 19.30
SCENE 2
- Vi må elske desse kidsa. Trass i dei aspekta vi ikkje kan godta, seier Aksel Hennie. Han snakkar om ungdomane som eig gate-Oslo. Dei som heng rundt Grønlandsleiret og Vaterland - og alle andre stader i byen. Ungdom som kjem inn på ein dårleg kurs og får utelukkande negative tilbakemeldingar frå dei som ikkje er ein del av deira verd, og som blir dratt lenger og lenger inn i ein spiral av eskalerande vald, krim og rus. Det er desse ungdomane sine liv boka til Oliver Lovrenski gir eit unikt innblikk i, og viser at her finst det også vennskap, kjærleik, sterke familieband og framtidsdraumar.
Les heile intervjuet med Aksel Hennie.
Frå musikkscenen til teaterscenen
På scenen har Hennie med seg skodespelarar som er handplukka til karakterane. Ein av dei er Jonas Benyoub, som har gjort stor suksess som rapartist og mellom anna har vunne Spelemann i kategorien hiphop. I det siste har han gjort seg merka som deltakar i Hver gang vi møtes på Tv2.
- Eg kunne ikkje tatt fatt på dette prosjektet utan han, seier regissøren.
No skal Benyoub debutere som skodespelar, og det er mykje som kviler på hans skuldrer. Han skal spele Ivor, som fortel historia gjennom tankar og refleksjonar,som tidvis materialiserer seg i scenar som utspelar seg med dei to kameratane Marco og Jonas. For dei som lurer, så blir det også nokre nye låtar på scenen.
Gatekultur
Forfattar Oliver Lovrenski har skrive boka på oslosk gate-sosiolekt, og denne er tatt vare på i sceneversjonen.
- Det er denne kulturen som ligg hjartet mitt nærast. Dette var oppveksten min. Det er folk utanfrå som kallar det eit kriminelt miljø. Alt gjekk føre seg her – forelskingar, vennskap og hjartesorg, forklarar Aksel Hennie.
- Kriminalitet og rus er dessverre ein del av verda, slik desse ungdomane kjenner den.
Vald som uroar
På scenen kjem dette til uttrykk gjennom klipp frå grupper i sosiale media der ungdom deler eigenproduserte valdsvideoar. Valdsbruken bekymrar Hennie. Den er blitt mykje grovare sidan han var ein del av eit liknande miljø på Lamertseter som ung.
Med framsyninga håpar han å kunne auke forståinga for livet til desse ungdomane, og på same tid kanskje vekke nokre ungdomar til å sjå at det finst ein annan veg.
Related links
Emner
Kategorier
Det Norske Teatret er Noregs største teater for refleksjon, oppleving og underhaldning. Teateret ligg sentralt i hovudstaden i eit moderne teaterbygg frå 1985 med 3 faste scenar, og over 250.000 publikummarar årleg.
