Pressemelding -
Kjersti Horn lanserer sin første teatersesong
Kjersti Horns første teatersesong er både ambisiøs og mangfaldig, og byr på masse ny norsk dramatikk, fleire sterke kvinnehistorier, KI-generert teater, politisk historie fortalt med glitter og glam og ferske forteljingar frå gata.
Den komande teatersjefen tar fatt på den nye rolla i teaterhuset med klare mål. Ho har kjent på utanforskap og på å vere annleis. Som teatersjef er det viktig for henne å markere at teateret er for alle. Og ho vil få teateret tilbake på radaren til både unge og gamle.
- Heile kunstnarskapen min er basert på sprekkar og feil. På det som gjer at vi alle ber på ei kjensle av å ikkje strekke heilt til. Teateret må vere ei linse for å forstå oss sjølv betre. For å få ei kjensle av at vi ikkje er åleine.
LES HEILE INTERVJUET HER.
Her er våren 2025 på Det Norske Teatret:
LADY MACBETH
Urpremiere 18. januar på Hovudscenen.
Historia om den unge ladyen som er fanga i eit ekteskap med ein mykje eldre mann, er eit fengslande portrett av ei undertrykt kvinne som blir brutal. Dette er ei heilt ny dramatisering - og regissør Melanie Mederlind lovar ei sterk forteljing om sex, død og makt.
JORDMOR PÅ JORDA
Oslo-premiere 23. januar på Hovudscenen
Fem år etter suksessen med Slåttekar i himmelen, kjem Teatret Vårt på gjesting frå Molde med ei ny framsyning i Edvard Hoem sin slektskrønike. I Jordmor på jorda møter vi Hoems eiga tippoldemor, den første jordmora i Romsdal, som forlot mann og barn for å følge kallet sitt.
SCENE 3 i 2025
Frå 23. januar på Scene 3
Tani Dibasey er teaterrabulisten som har gitt fingeren til teater-Noreg. No skal han i lag med den grensesprengande multikunstnarduoen Only Slime ta over programmeringa på Scene 3 i eit heilt år. Det vil boble over av konsertar, happenings og teater i ulike sjangrar.
ONCE
Noregspremiere 1. februar på Scene 2
Musikken spelar sjølve hovudrolla i denne musikalen. Once hadde premiere på Broadway i New York i 2012, og vann ein drøss av Tony Award-prisar. Den jordnære kjærleikshistoria og den upolerte, irskinspirerte folkrocken blir framført live på scenen av skodespelarane sjølve.
FORBRYTAR OG STRAFF
Urpremiere 7. februar på Scene 2
Romanen Forbryter og straff av Kathrine Nedrejord, blei nominert til Nordisk Råds litteraturpris da den kom ut. No blir romanen teater. Dette er ei djupt personleg og samtidig universell forteljing om kvinners liv, og om korleis kvinner blir oppfostra i redsle og må bere andres skuld på skuldrene sine.
DA VI VAR YNGRE
Urpremiere 28. februar på Scene 2
Berre 19 år gammal gav Oliver Lovrenski ut romanen Da vi var yngre, som skildra eit Oslo og eit ungdomsmiljø mange ikkje hadde kjennskap til frå før. Når forteljinga no kjem til scenen, blir det også debuten til Aksel Hennie teaterregissør, og rappar Jonas Benyoub som skodespelar.
EUROPAVISJONAR
Urpremiere 1. mars på Hovudscenen
I 2023 skapte regissør Simen Formo Hay stor begeistring med Døden på Oslo S på Økernsenteret, som blei framsyninga alle "måtte" sjå. I vår skal han i lag med fleire kople Europas nyare historie opp mot Eurovision Song Contest, i ein songkonkurranse der Angela Merkel og Vladimir Putin står bak nokre av bidraga.
PROSESSEN MOT MENNESKA
Urpremiere 29. mars på Scene 2
Maskinens natur er å vere rasjonell. Men kva skjer når robotens rasjonalitet møter den menneskelege irrasjonaliteten? Velkommen inn i eit altomfattande digitalt univers der vi undersøker innsida av maskinen, og draumen om verda utanfor. Framsyninga tek form av ein rettssak, der publikum står på tiltalebenken, og må forsvare seg mot ein kunstig intellingens.
IKKJE EIN LYD
Urpremiere 5. april på Hovudscenen
Arne Lygre hadde vanvittig suksess med framsyninga Tid for glede på Hovudscenen i 2022. No er han tilbake med ein ny tekst på Hovudscenen. Ikkje ein lyd handlar om det å vende tilbake til ein stad der ein før var ein annan, til eit liv nærare naturen, eller til stilla.
ARV OG MILJØ
Nypremiere 3. mai på Hovudscenen
Vigdis Hjorths omdiskuterte roman sette fyr på debatten om såkalla verkelegheitslitteratur da den kom ut i 2016. I 2018 blei forteljinga dramatisert på Den Nationale Scene i Bergen, i regi av Kjersti Horn. Framsyninga fekk fantastiske kritikkar, og blei nominert til Heddaprisen både for Årets framsyning og Beste regi.
UNNI OG GUNNI MÅLAR
Våren 2025 i foajeen ved Scene 2
For dei minste kjem Unni og Gunni til foajeen utanfor Scene 2 i ei nær og sanseleg framsyning. Dei er to gode venner som synest det er på tide å friske opp litt heime. Dei finn fram målarkostar og forvandlar den kvite igloen til ein vakker regnboge.
Emner
Kategorier
Det Norske Teatret er Noregs største teater for refleksjon, oppleving og underhaldning. Teateret ligg sentralt i hovudstaden i eit moderne teaterbygg frå 1985 med 3 faste scenar, og over 250.000 publikummarar årleg.
