Pressemelding -
Mimmi Tambas kritikarroste album til Hovudscenen
Det har vore lett å setje artist og skodespelar Mimmi Tamba i bås. Oppgjeret med stereotypiane – og kanskje eigne demonar – tok Tamba gjennom albumet Semper Eadem. No kjem musikken til Hovudscenen i form av ein teatral konsert.
SEMPER EADEM
av Mimmi Tamba
URPREMIERE LAURDAG 14. JANUAR KL. 18.00
HOVUDSCENEN
«Dette albumet slår helt på egen hånd knockout på lytteren, samtidig har det en konseptuell overbygning som nærmest roper på en dramaturg, en regissør og en scene» skreiv Dagsavisens kritikar om musikkalbumet til Mimmi Tamba, Semper Eadem, da det kom ut i 2020, og trilla ein seksar på terningen. Det Norske Teatret har tatt han på ordet, og no kjem albumet til live på Hovudscenen med Mimmi Tamba sjølv og Heidi Gjermundsen Broch.
Krysspress
I Semper Eadem blir vi vitne til ein identitetskamp som blir utkjempa på mange slagmarker. Artist og skodespelar Mimmi Tamba er født i Noreg, men har røter i Senegal. Ho har levd heile livet mellom to kulturar, og har aldri kunna definere seg som heilt norsk. Tamba har livslang erfaring i å bryte med stereotypiar og normer, både når det gjeld kjønnsidentitet, bakgrunn og musikksjanger.
Elisabeth I sitt motto
For å finne seg sjølv måtte Mimmi Tamba ta omvegen om den engelske dronninga Elisabeth I, som er både ein spegel for og motsatsen til henne sjølv. Difor ber også både framsyninga og musikkalbumet den latinske tittelen Semper Eadem, etter dronningas valspråk, som tyder "Evig den same". Det var styrken og standhaftigheita til den strenge dronning Elisabeth I som tiltalte Tamba. Men å leve etter dette mottoet kjem også med ein pris.
Les intervju med Mimmi Tamba: Kva for eigne draumar må ein sette til side for tene noko større, og kva er kjernen din når «sjølvet» alltid er under press?
Teater og konsert
På scenen vil fem dansarar, fullt band og heile scenemaskineriet vere med på å skape ei pumpande hylling til dei som står i ein stadig identitetskamp med, for og mot seg sjølv. Det blir ei sanseleg framsyning som også står identitetskrise med seg sjølv om kva den skal vere - mellom teater og konsert.
Related links
Emner
Kategorier
Det Norske Teatret er Noregs største teater for refleksjon, oppleving og underhaldning. Teateret ligg sentralt i hovudstaden i eit moderne teaterbygg frå 1985 med 3 faste scenar, og over 250.000 publikummarar årleg.
