Ny haust på Det Norske Teatret

I dag legg Det Norske Teatret fram heile programmet for hausten 2020. Etter ein annleis vår, satsar Det Norske Teatret på ein sterkt musikalsk sesong med heile tre musikkteaterframsyningar på Hovudscenen.

Les meir: - Etter ein amputert teatervår er det all mogleg grunn til å gle seg til ein heftig teaterhaust på Det Norske Teatret, seier teatersjef Erik Ulfsby. 

Urpremiere 5. september på Hovudscenen

Maja Lundes Bienes historie har sett spor over heile verda, og med god grunn. Forteljinga om korleis ein kollaps i ein tilsynelatande liten del av økologien kan ende opp med å true alt liv, har fått ytterlegare aktualitet. Vi kjenner oss meir sårbare enn vi gjorde før, og denne storsatsinga handlar om sårbarheit på mange plan. Det Norske Teatret samarbeider for første gong med med Nasjonalballetten. Nils Bech har komponert musikken.

Premiere 14. november på Hovudscenen

Tolvskillingsoperaen av Brecht/Hauptmann/Weill var ei av framsyningane som eigentleg skulle hatt premiere i vår, men kjem sterkt tilbake i haust. I denne versjonen ønskjer regissør Tore Vagn Lid denne å rette blikket inn i ei tenkt framtid og i ei mogleg ny verkelegheit der det meste, sjølv nasjonalparkane, er privatiserte, det meste er til sals og kunstig intelligens trugar med å ta over menneskas rolle.

Urpremiere 3. oktober på Hovudscenen

Bob Dylan er musikaren og poeten som kanskje meir enn nokon annan har påverka og prega rockemusikken. I framsyninga Vikla inn i blått – Dylan på nynorsk tolkar eit breitt samansett ensemble og orkester Bob Dylans tekstlege og musikalske univers, i Tom Roger Aadlands gjendikting. Eirik Stubø har regien.

Premiere 10. september på Scene 2

 I Persona er det kunstnarens rolle, og kanskje kunstnarens sjølvbedrag, som blir undersøkt. Ingmar Bergmans film frå 1966 er eit skakande og sjølvransakande meisterverk. Hovudpersonen er den kjente skodespelaren Elisabeth Vogler, spelt av Gjertrud Jynge, som har inntatt ei ny og uventa rolle: ho har slutta å snakke. Den andre hovudpersonen er den unge sjukepleiaren Alma, spelt av Kjersti Dalseide, som har fått i oppgåve å ta seg av henne. Johannes Holmen Dahl har regien.

Urpremiere 14. september ute

GÅ er femte og siste del i Goksør/Martens pentalogi LIVET – ei rad med framsyningar som skildrar overgangane i livet frå fødsel til død. Denne framsyninga utforskar korleis smittevernet utfordrar forholdet til våre næraste, og korleis fråværet av ritual påverkar oss. Publikum får også denne gongen utdelt høyretelefonar og blir med på ei vandring utandørs.

Premiere 28. august på Scene 2

Publikum kan vente seg ei upolert og røff framsyning med ensemblerockebandet "Waffel SS" når kroatiske Ivica Buljan har regien på rabulisten Jens Bjørneboes hovudverk. Buljan var sist noregsaktuell med Den siste kongsfesten på Scene 2 i 2018, og framsyninga markerte seg raskt i den norske offentlegheita for si ekspressive form.

Premiere 9. oktober på Scene 2

Solaris av Stanislaw Lem er ein framtidsfabel om mennesket i møtet med framand intelligens. Teaterstykket er basert på Stanislaw Lems roman frå 1961, ein kultklassikar innan sci-fi-sjangeren som også har blitt filmatisert fleire gonger.

Premiere 2. oktober på Scene 3

Terje Nordby og Lasse Kolsrud har tatt opp tråden der dei slapp med hovudkarakteren frå stykket med same tittel, som hadde premiere i 1997. 20 år er gått. korleis går det med den gamle sjømannen Lauritz Moe no?

Urpremiere 7. oktober på Rommen Scene

T-banens Linje 5 tek bladet frå munnen og fortel om byen vår og menneska i han. Saman med forfattaren av Tante Ulrikkes vei, Zeshan Shakar, skriv Don Martin forteljinga om dei ulike individa som kvar dag pressar seg inn på den same strekninga. Kanskje blir det å ta T-banen aldri meir det same?

Premiere 18. november på Scene 3

Regissør Kjersti Horn er blitt kjent som ein uredd regissør som ikkje går av vegen for å ta tak i dei mørkare drivkreftene som bur i oss menneske. Denne gongen er det Sarah kanes brutale stykke som står for tur. Ho spør, som Bjørneboe: Kvifor er vi menneske så valdelege?

Les meir på nettsidene våre her: