Sagprosa på Hovudscenen

Det er eit stort eksperiment som går føre seg på Hovudscenen. Kan skogens ro få ei scenisk form?

HEIL VED
inspirert av boka til Lars Mytting. Musikk av og med Stein Torleif Bjella
URPREMIERE SØNDAG 12. NOVEMBER KL. 18.00
PÅ HOVUDSCENEN

PREMIERESAMTALE
FØR PREMIEREN KL. 17.00
Lars Mytting og Erik Ulfsby i samtale med Kari Toft

- Det er ei hyllest til arbeidet i skogen. Det fysiske arbeidet er i sentrum, men hovudpersonen er treet som til slutt blir til eit bål, seier teatersjef og regissør for framsyninga, Erik Ulfsby.
Størstedelen av prøvetida har gått føre seg ute i skogen. Her har skodespelarane jobba praktisk som skogsarbeidarar og laga handlingsskisser som til slutt er sett saman til ei framsyning.

Skodespelar Frode Winther kappar ved under teaterprøvane i skogen på Hurum.

Kjelde til varme

- Det er ei eller anna ro i arbeidet med treet. I ei tid der uro breier seg, kan det vere fint å gå tilbake til ein plass utan konflikt. Ein plass med enkle og forståelege oppgåver. Mytting skreiv jo at hadde du nok ved, så var du varm. Hadde du lite, frøys du og hadde du for lite så døydde du. Slik er det ikkje lenger, seier Ulfsby, men legg til at veden framleis er viktig, og at den stadig blir meir populær, både som varmekjelde og samlingspunkt.
- Levande varme gir ei rikare oppleving, folk trekker seg mot elden slik vi samla oss kring leirbåla i tidlegare tider. Fordi menneskets forhold til eld er så gamalt, så handgripeleg og universelt – er veden alltid i berøring med det inste i oss, skriv Mytting. Det er noko der, seier Ulfsby.

Denne sakte-teater-framsyninga er omslutta av nye låtar og musikk av og med Stein Torleif Bjella, som får musikalsk følgje av skodespelarane på scenen, Pål Christian Eggen, Frode Winther, Christian Ruud Kallum, Jon Bleiklie Devik.

- Kvifor er det så få menn blant publikum? Les heile intervjuet med regissør Erik Ulfsby om framsyninga.

- Eg er sterk i trua på at folk vil like å sjå på at folk arbeider, seier regissør Ulfsby. Les meir om prøvetida i skogen.

- Eg håpar menn som føler seg utilpass i finklede og best likar å gå med Felleskjøpet-overall og vernebukse, vil komme til teateret for å oppleve vedhogst på scenen. Les heile intervjuet med Lars Mytting, forfattaren bak suksessboka Hel ved.