Frå skulebenk til tredemølle

Tysdag var studentar, fagtilsette og representantar frå ulike treningssenter samla for fagleg påfyll innanfor fitness og trening. Formålet for fagdagen er å sikre treningssenterbransjen rekruttering og fagleg kompetanse, og styrke idrettsutdanninga sitt undervisningstilbod.

På rekrutteringstokt

Ingunn Tangerås, eigar av treningskjeden Aktiv 364 i Bergen er på utkikk etter potensielle arbeidstakarar til sine treningssenter. – Vi er her for å møte studentar og rekruttere tilsette. Vi har over 100 tilsette og har stadig behov for nye. Idrettsutdanninga ved HiSF er ei av dei få utdanningane i landet som kan dekke behova våre. Her er studentane både skulerte som personlege trenarar (PT) og som gruppetrenarar. Dessutan var det utruleg kjekt å få fagleg påfyll av engasjerte forelesarar her i dag, avsluttar Tangerås.

Rett i jobb

Ole Kristian Haug (bildet) fullførte bachelor i idrett, fysisk aktivitet og helse ved HiSF våren 2011, og er i dag tilsett ved Elixia Kokstad.

- Eg var sikker på at det var personleg trenar eg ville bli allereie då eg var 16 år. Eg starta med å studere idrett 1 på Bali før turen gjekk vidare til HiSF og bachelorstudiet der, inklusive eit halvt år med utveksling i Australia.

Ole Kristian er ikkje i tvil om at idrettsutdanninga ved HiSF har kome godt med: - Utdanninga her gitt meg eit heilskapleg bilde når det gjeld å kunne leggje til rette for trening. Teorien har gitt meg tryggleik og fagleg tyngde i kontakt med kundane. Dette gir meg sjølvtillit som PT, held Ole Kristian fram.

Utdanninga som PT angrar han ikkje på: - Å jobbe som PT er berre SÅ gøy. Eg har det moro kvar einaste dag på jobb! Det er utruleg inspirerande å sjå resultata som kundane oppnår, avsluttar Haug, som jobbar fulltid som personleg trenar.

Seminaret, som ein har mål om å arrangere årleg, er ein del av samarbeidsavtalen med bransjeorganisasjonen Virke Trening.