Pressemelding -
MS Vesterålen til Green Yard Kleven
Hurtigruteskipet MS Vesterålen kjem til Green Yard Kleven for å utføre ei ombygging. Arbeidet er venta å starte opp i veke 43.
-Vi er veldig glade for at Hurtigruten gir oss tilliten til å utføre dette oppdraget. Det gir oss moglegheit til å tilsette enno fleire og ta eit steg vidare for å bygge opp og behalde viktig kompetanse ved verftet, seier Kjetil Bollestad, administrerande direktør i Green Yard Kleven.
Green Yard Kleven skal installere eit nytt system for gangveg på MS Vesterålen. Dette inneber å bygge ei ny sjakt som går over tre dekk, med tilhøyrande ombygging av innreiing og dører. Oppdraget gir også arbeid for lokale leverandørar. Mellom anna skal Hareid Group stå for elektroinnstallasjon, og sjølve gangvegmodulen skal leverast av Ulmatec.
- Det er godt å vere tilbake på Kleven, og vi synes det var kjekt at våre gode vener på Kleven leverte det beste tilbodet. Vi bruker tida godt medan skipa ligg i opplag til å gjere planlagt vedlikehald og oppgraderingar. Då skaper vi samstundes aktivitet i den maritime næringa fleire stadar på kysten, seier pressevakt Tarjei Kramviken i Hurtigruten.
MS Vesterålen er nyleg blitt oppgradert, og har mellom anna splitter nye motorar som gjer skipet til eit lavutslepp-skip. MS Vesterålen skal gå rutetrafikken mellom Bergen og Kirkenes fram til 2030.
-Vi ønsker Hurtigruten velkomen tilbake til verftet og ser fram til eit fortsatt godt samarbeid!
I tillegg til arbeidet med MS Vesterålen, arbeider Green Yard Kleven for tida med oppgradering av lekteren Boabarges 33 for Boa Barges AS, samt ombygging av trål/snurrevad- fartøyet Nordbas for NordnesGruppen AS.
Emner
- Industri, produksjon
Regions
- Møre og Romsdal
Green Yard Kleven AS i Ulsteinvik er saman med søsterverftet Green Yard Feda på Angholmen ein del av Green Yard Group. Green Yard Kleven byggjer store, avanserte fartøy innan fleire segment, og tek også på seg ombyggingar og reperasjonar. Verftet har stor kapasitet for stålproduksjon, og er det verftet i Noreg som har størst grad av eigen robotisert stålproduksjon. Verftet skal også satse stort framover på å drive miljøvennleg resirkulering og modifisering av skip. Verftet er ISO-sertifisert innan miljø og kvalitet.
