Sensasjonelt tilskot til samlinga i Nasjonalmuseet

– For første gong blir eit måleri av Ernst Ludwig Kirchner og Erich Heckel å sjå i ei offentleg samling i Noreg. Det er ein sensasjon, seier Nils Ohlsen, avdelingsdirektør for eldre og moderne kunst i Nasjonalmuseet.

Den permanente utstillinga i Nasjonalgalleriet er utvida med to nye måleri: Erich Heckels Geigerin / Jente som spelar fiolin, 1912, olje på lerret, og E. L. Kirchners Der Krankenwärter / Sjukepleiar, 1917–18, olje på lerret. Dette er dei første måleria av desse to sentrale ekspresjonistane i ei offentleg norsk samling.

Bileta viser sentrale motiv frå verka til dei to kunstnarane. Måleriet til Heckel framstiller to musiserande jenter i sterkt abstrahert form, medan måleriet til Kirchner viser ein sjukepleiar på klinikken der han vart behandla etter eit fysisk og psykisk samanbrot som artillerisoldat i første verdskrig. Motivet minner om heilfigurportretta til Munch, og vi kan trekkje parallellar også biografisk: begge kunstnarane var innlagde på sanatorium grunna fysisk og psykisk samanbrot og begge fann seinare ein fristad fjernt frå storbyen – Munch ved Oslofjorden og Kirchner i dei sveitsiske alpane.

 Kirchner og Heckel var to sentrale medlemmar i kunstnargruppa «Die Brücke», som vart danna i 1905 og markerte startskotet for den tyske ekspresjonismen. Edvard Munch er saman med van Gogh, Gauguin og Cézanne ein viktig farsfigur for den tyske ekspresjonismen.

Dei to verka er dei hittil siste av i alt seks eksklusive innkjøp som Sparebankstiftinga har gitt i langtidsdepositum til Nasjonalmuseet. Sparebankstiftinga DnB NOR har sidan 2010 samarbeidd med avdelinga for eldre og moderne kunst om å byggje opp ei samling av tyske ekspresjonistar og i snitt gjeve to bilete kvart år.

For meir informasjon, kontakt avdelingsdirektør eldre og moderne kunst Nils Ohlsen tlf. 404 36 363 eller Anders Bjørnsen, Sparebankstiftelsen, ansvarlig for Kunstsamlinga og Dextra Musica tlf. 901 40 861.

 Du kan laste ned høgoppløyselege bilde av verka nedanfor.