Sildeoperakulissar på veg til Operahuset Nordfjord

Operaen Sildagapet er no i den siste innspurten fram mot verdspremiere onsdag 4. oktober i Operahuset Nordfjord. No skal scena i operahuset forvandlast til sildehamna Måløy på 1950-talet. 

 Lokale dugnadssnikkarar har sidan tidleg i sommar arbeidd med komplekse kulisseelement under leiing av våre scenografar Åse Hegrenes og Sunniva Bodvin. Sist helg vart den store bakveggen i operahuset måla av dyktige dugnadsarbeidarar og omskapt til himmel, skyar og hav. I skrivande stund er store kulisse-seksjonar på veg frå verkstaden til operascena, der dei skal monterast og ferdigstillast fram mot helga. Scena skal omskapast til eit travelt hamneområde i Måløy. Bakdekket på ein fiskebåt utgjer ein stor del av kulissane, med store stablar av sildekasser frå Hyen som stemningsskapande element. Ein kan forvente både bølgeskvulp og måkeskrik, så publikum kjem nesten, men berre nesten til å  kjenner lukta av salt sjø, tang og tare når overtyren kling frå orkestergrava. 

Det er all grunn til å planlegge eit besøk i Operahuset Nordfjord i perioden 04.-15. oktober.