Verdspremiere på Sildagapet i dag!

Dagen er komen. Operastemninga breier om seg i bygda og truleg i Nordfjord. Billettsalet til heile produksjonen går godt, generalprøva var ein suksess og Operahuset Nordfjord er ferdig pynta til fest. Ting går rette veg for Opera Nordfjord om dagen!

Kl 18.30 i kveld går sceneteppet opp (retting: tilsides) og publikum vil få oppleve sildeeventyret på 50-talet, på godt og vondt. For oss som har jobba med dette ei god stund gledar vi oss til å syne fram den fantastiske verda som vert skapt på scena av kulissar, lys, lyd og stemmer. 

Allerede før du entrar kultursalen er festen i gang. Du blir møtt av raud løpar og stemningsfulle lokaler pynta etter alle kunstens reglar og tidsånda frå 50-talet i Måløy. Her er sildestimar, trebåt, fotoutstilling, garn, fiskarar og tidsriktige artiklar. 

I garderoben står trivelige frivillige klare til å ta vel imot deg og passe på ytterklede dine medan du skal hygge deg. Baren vil vere open ein time før framsyninga og i pausen. Det er mogleg å kjøpe delikate wraps med blant anna sild, røykelaks og spekeskinke, samt anna snacks som du kan kose deg med. Du kan bestille pausemat i baren på førehand. 

Bortsett frå på premieredagen, vil det bli introduksjon i kinosalen 30 minutt før framsyning. 

Velkommen til framsyning!