Press release -
Cyhoeddwr BBC a goroeswr strôc yn derbyn sialens cerdded i godi arian dros strôc
Bydd Al Dupres, 54, o Gaerdydd yn cymryd rhan yn nhaith gerdded Step Out y Gymdeithas Strôc o gwmpas llyn Parc y Rhath am 2yh ar 10 Mehefin.
Roedd Al, sydd yn gweithio fel cyhoeddwr i BBC Cymru, ar ei wyliau yn Nhexas flwyddyn ddiwethaf pan gollodd y gallu i siarad yn ddealladwy.
Meddai Al:
“Nid oeddwn yn gallu siarad yn iawn am 24 awr, a chefais ofn gan fod siarad mor bwysig i fy ngwaith. Ond mi wnes i ddeffro mewn ysbyty dysgu yn Austin gyda therapydd llefarydd ger llaw, a dechreuodd gweithio gyda fi’n syth. Erbyn hyn yr unig effaith hir dymor yw bach o wendid yn fy nghoes chwith.
“Cafodd fy mam strôc, a chafodd ei pharlysu ar un ochr. Ddaru hi wir ddioddef felly dwi'n ddiolchgar pob dydd fy mod i’n gallu siarad a chyfathrebu. Mae fy nghalon yn mynd allan i’r rhai nad yw’n gallu gwneud hynny.”
Mae Al eisoes wedi codi £320, ac mae eisiau gwneud mwy o bobl yn ymwybodol o symptomau strôc.
Ychwanegodd Al:
“Pan gefais i fy strôc, mi wnes i jest gwglo ‘deffro ‘fyny yn siarad iaith tramor’. Byddai’n dda petawn i wedi gwybod am y prawf FAST, lle mae ‘S’ yn sefyll am ‘Speech’, gan fod trafferth siarad yn symptom strôc.
“Nid oeddwn yn deall fy mod i wedi cael strôc nes i mi ffonio fy ngwraig, a ddaru hi ddweud mai dyna beth oedd wedi digwydd. Dwi wir eisiau i bawb fod yn ymwybodol o’r arwyddion.”
Bydd teithiau cerdded Step Out yn digwydd ledled Cymru rhwng Mai a Gorffennaf 2018 i godi arian i’r Gymdeithas Strôc, er mwyn cynnig cymorth i oroeswyr strôc a’u teuluoedd. Mae strôc yn un o’r prif resymau dros anabledd ac mae bron i 66,000 o bobl yng Nghymru yn byw gydag effeithiau strôc. I’r goroeswyr sy’n cymryd rhan yn y daith, mae hyn hefyd yn ddathliad o oresgyn sialensiau strôc, ac ail-afael yn eu hannibyniaeth.
Meddai Margaret Street, Cyfarwyddwr y Gymdeithas Strôc yng Nghymru:
“Mae strôc yn taro mewn eiliad ac mae’n achosi mwy o anableddau nac unrhyw gyflwr arall. Mae’n ysbrydoliaeth i weld Al yn derbyn y sialens cerdded a chodi arian hanfodol i gefnogi goroeswyr eraill.
“Mae Step Out yn daith cerdded bydd yn hwyl i bawb, beth bynnag yw eich oedran neu lefel ffitrwydd. Rydym yn gwahodd y gymuned i gyd i ddod a mwynhau'r diwrnod yma a helpu i ni ei wneud yn ddigwyddiad i’w gofio.”
Mae teithiau Step Out yn digwydd dros Gymru a Lloegr yr haf yma. Ymwelwch ag www.stroke.org.uk/stepout i arwyddo fyny i’r daith agosach i chi.