Pressemelding -
Eventyrleg og musikalsk teater for barn
Eventyrleg teater med utgangspunkt i ei brutal verkelegheit blir formidla med musikk og magi frå Det Norske Teatrets Hovudscene i haust.
NILA OG DEN STORE REISA
URPREMIERE LAURDAG 13. OKTOBER KL. 18.00
HOVUDSCENEN
Det Norske Teatret har tradisjon for å satse på nytt og uprøvd teater for barn, og haustens storsatsing er ikkje noko unntak. Denne gongen handlar det om vesle Nila som veks opp i ein land langt unna. Der er ho landsbyens fantasifulle og sjarmerande historieforteljar, og fortel eventyr om alt frå drakar og prinsar til havfruer. Men ein dag bryt det ut krig, og ho må legge på flukt i ein liten båt. Ho drøymer om eit fredeleg liv i Norden, og på vegen over havet møter ho fleire farar, i tillegg til at ho må redde ein gut som ligg og flyt i vatnet. Nila må også kjempe ein indre kamp mot sine eigne demonar, når dei mørke tankane tek over fantasiane hennar, som plutseleg blir skremmande verkelege.
FLYKTNINGEPROBLEMATIKK
– I våre dagar kastar desperate flyktningar dagleg loss og legg i veg på livsfarlege reiser over eit hav som vi skandinavar i årevis har hatt som feriefavoritt. Berre i år har omkring 1000 menneske mista livet på sjøen under flukt frå krig eller på veg til eit betre liv. Det er vår oppgåve å spegle det som hender ute i verda på scenen, også for barn, meiner dramatikar og regissør Maria Kjærgaard–Sunesen. Ho har skapt ei framsyning som tek publikum med opp i lufta og under havet, til møte med fuglar som snakkar, fiskar som syng, vindar frå alle verdshjørne og den vonde draken Morgana. Framsyninga er akkompagnert med Anders Ortmanns musikk, framført av eit lite orkester på scenen.
DEBUTANT I HOVUDROLLA
Eit stort ensemble vil mane fram forteljinga og fantasirike draumescenar gjennom song og dans. I spissen som Nila står Catharina Vu. Ho gjekk ut frå Det Norske Teatrets eigen teaterutdanning Det Multinorske i vår, og dette er hennar debut som profesjonell skodespelar. Det same gjeld for Emil Rodrigo Jørgensen, som spelar guten som flyt i vatnet, Yasin.
SJÅ FRAMSYNINGA TA FORM
Les meir om Nila og den store reisa på Det Norske Teatrets nettsider.
Emner
Kategorier
Det Norske Teatret er Noregs største teater for refleksjon, oppleving og underhaldning. Teateret ligg sentralt i hovudstaden i eit moderne teaterbygg frå 1985 med 3 faste scenar, og over 220.000 publikummarar årleg.
