Fem nominasjonar og Heddadagar på Det Norske Teatret

I dag blei nominasjonane til årets Heddaprisar lagde fram, og tre av Det Norske Teatrets framsyningar har blitt heidra med nominasjonar. Alle tre blir det mogleg å sjå under teaterfestivalen Heddadagane 9. - 18. juni, da heile byen vil koke over av teateropplevingar frå heile landet. Det Norske Teatret har også seks gjestespel frå andre teater på gjesting.

Ikkje overraskande, kanskje, så er Sara Khorami nominert for Beste kvinnelege hovudrolle for bragden med å spele Kristin Lavransdotter i åtte timar i strekk. I tillegg er Joachim Rafaelsen nominert som Beste mannlege medspelar for sine roller i framsyninga. Emil Johnsen er nominert for rolla som eg-personen i Édouard Louis forteljing om mora i Ei kvinnes kampar og forvandlingar. Og sist, men ikkje minst, så er Mimmi Tambas framsyning basert på hennar eige musikkalbum; Semper Eadem, nominert både for Beste musikkteaterframsyning og for Beste audiovisuelle design, ved Torkel Skjærven.

Gjestespel på Det Norske Teatret

Til Heddadagane kjem også ei tidlegare Hedda-nominert framsyning på gjesting, nemleg Patricks triks frå Brageteatret/Den Nationale Scene, som var nominert som Beste Barneframsyning i 2002. Frå Haugesund Teater/Artisan Teater kjem den tankevekkjande og provoserande framsyninga Omsama Bin Laden: The One Man Show. Turnéteatret i Trøndelag tek turen med den kritikarroste framsyninga IDIOT!, som fortel den vonde historia om Statens Abnormskole ved Røstad i Trøndelag og er nominert til Heddaprisen både for Beste scenetekst og Beste regi i år. Åarjelhsaemien Teatere vil vise barneframsyninga Gïele Luvlede – Stemmer fra øst, som er eit danserisk og musikalsk møte med austsamane på Kola-halvøya og deira unike dansetradisjonar. Unge Viken Teater kjem også med teater for dei minste, nemleg Verden sa ja - basert på Kaia Dahle Nyhus barneboksuksess om korleis verda blei til. Og så vil sjølvsagt Det Andre Teatret komme for å stele ein av scenene våre - denne gongen blir det Ronja Røvardotters scenografi som blir åstad for Ut og stjæle scener.

Framyningar frå Det Norske Teatret

I tillegg til dei Heddaprisnominerte framsyningane, vil Det Norske Teatret ta fram igjen Trilogien, som vann prisen for Beste regi og Beste kvinnelege skodespelar i 2020. Vi vil spele den absolutt siste framsyninga av Svein Tindbergs Abrahams Barn, som har vore på plakaten sidan 2011. Artist og no skodespelar kjend som Hkeem vil spele si framsyning ABDUL ≈ HKEEM på Rommen Scene. Her på Det Norske Teatret kan publikum også få med seg
Det såkalla Heisstykket, Romeo og Julie, Ronja Røvardotter, Tryllefløyta, Sudden Death, Tante Ulrikkes vei, og Sporv og engel.

I tillegg til alt dette, vil Det Norske Teatrets også vere åstad for ei rekkje av Heddadaganes fagprogram.