Pressemelding -
Milo Rau – når politikk og teater ikkje er mogleg å skilje
Det er eit skup at regissør og dramatikar Milo Rau, den politisk engasjerte leiaren av Wiener Festwochen, no gjer eit stopp på RESISTANCE NOW-turneen på Det Norske Teatret.
WORKSHOP MED MILO RAU
LAURDAG 13. SEPTEMBER KL: 12.00
SAMTALE MED MILO RAU: ON THE ART OF RESISTANCE
LAURDAG 13. SEPTEMBER KL. 18.00
ANTIGONE IN DE AMAZON
av Milo Rau / MST & NTGent (Belgia)
LAURDAG 13. SEPTEMBER KL. 14.00 og 19.00
SCENE 2
Rau er rabulisten i europeisk teater og meiner at kunst ikkje handlar om å skildre verda, men å endre henne. Han er blitt omtala som både den “mest påverknadsfulle”, “mest skandaløse” og “mest ambisiøse” europeiske regissøren i vår tid.
Sveitsiske Rau kjem til Fossefestivalen med framsyninga Antigone in de Amazon. Med denne har han saman med urfolk, aktivistar og skodespelarar frå Brasil og Europa skapt ein politisk versjon av Antigone for det 21. hundreåret.
Aktivistisk teater
Antigone in de Amazon (frå 2023) kastar lys over ein dramatisk konflikt i nyare brasiliansk historie, der ein fredeleg demonstrasjon om jordbrukarrettar resulterte i at 19 bønder blei drepne av militærpolitiet. Framsyninga er ein allegori over den moderne stat og eigedom- og bruksrett, fortalt gjennom bruk av dokumentariske element, film, musikk og gjenskapte hendingar - i møte med Sofokles sin Antigone.
Resistance now!
Den anerkjende teaterregissøren har utvikla eit globalt program der han tar sikte på å kople saman kulturmenneske frå heile verda i ein delvis symbolsk, delvis praktisk handling av solidaritet og kulturell motstand mot autoritære krefter, isolasjonisme og sensur. RESISTANCE NOW! er så langt støtta av 200 kulturorganisasjonar i 50 land. Målet for kampanjen er eit samarbeid med EU om eit nytt juridisk rammeverk som tar sikte på å beskytte kultur og ytringsfridom: Den europeiske kulturfridomsloven.
RESISTANCE NOW-kampanjen følger opp Milo Raus’ utforsking av den ekstreme høgresida, som for eksempel prosjekta hans BREIVIKS STATEMENT (2012) – som blei forbode i fleire land – eller THE VIENNA TRIALS (2024), der han stilte det høgreekstreme partiet FPÖ for retten. I 2026, som eit klimaks på RESISTANCE NOW-turneen, vil Rau lansere ei offentleg konstitusjonell rettssak mot det tyske høgreekstreme partiet AfD (Alternativ for Tyskland) under tittelen THE TRIAL AGAINST GERMANY.
Regissør Milo Rau
Milo Rau er eit stjernenamn i europeisk teater. Han har vore teatersjef ved NTGent og frå 2023 kunstnarisk leiar for Wiener Festwochen. Rau sitt kunstsyn og utrykk er at kunst ikkje handlar om å skildre verda, men å endre ho. Gjennom iscenesettingar av politiske spel og maktkampar i ulik form, peikar han på strukturelle samfunnsproblem. Rau har gjesta toneangivande festivalar som Berliner Theatertreffen, Festival d`Avignon og la Biennale di Venezia.
Related links
Emner
Kategorier
Det Norske Teatret er Noregs største teater for refleksjon, oppleving og underhaldning. Teateret ligg sentralt i hovudstaden i eit moderne teaterbygg frå 1985 med 3 faste scenar, og over 250.000 publikummarar årleg.
