Pressemelding -
Opnar nye dører i Dylans univers
Bob Dylan blir hylla av artistar og forfattarar verda over. I 2016 blei han tildelt Nobelprisen i litteratur og i 2020 set Det Norske Teatret opp ei konsertframsyning med fleire nye norske omsetjingar for å opne nye dører til det dylanske universet.
VIKLA INN I BLÅTT - DYLAN PÅ NYNORSK
tekst og musikk av Bob Dylan, gjendiktingar ved Tom Roger Aadland
URPREMIERE LAURDAG 3. OKTOBER KL. 18.00
PÅ HOVUDSCENEN
Bob Dylan har skrive meir enn 600 songar, alt frå balladar, tradisjonell blues, songar med klåre politiske bodskap til eksperimentell rockepoesi. Det Norske Teatrets nye husregissør, Eirik Stubø har fått med seg jazzbandet til broren, Håvard Stubø, for å finne nye sider ved ein av vår tids største poetar. Artist og Dylan-entusiast Tom Roger Aadland har omsett songar som aldri har vore framførte på norsk tidlegare. Blanda med diverse filmmateriale håpar dei å introdusere Dylans verd for nye generasjonar, i tillegg til å vise den mangesidige kunstnarskapen.
LES MEIR: Tekstane hans er skrivne for å syngjast på ein scene, seier gjendiktaren Tom Roger Aadland.
LEIK MED ROLLER
Bob Dylan har sjølv leika med roller gjennom karrieren. På scenen står eit songsterkt skodespelarlag klar til å tolke Dylan; Bjørn Sundquist, Mimmi Tamba, Ina Svenningsdal, Morten Svartveit, Gjertrud Jynge, Paul-Ottar Haga, Heidi Gjermundsen Broch, Lasse Kolsrud og Ingrid Jørgensen Dragland. Det blir både ikoniske hits og mindre kjende songar henta frå nesten heile Dylans karriere, frå andrealbumet The Freewhelin´ Bob Dylan (1963) til den siste utgjevinga hans, Rough and Rowdy Ways (2020).
LES MEIR: Bob Dylan er ein sjangeroverskridande poet, som aldri heilt har late seg plassere eller definere, skriv dramaturg Siri Løkholm Ramberg.
Les meir om framsyninga Vikla inn i blått på nettsidene til Det Norske Teatret.
Utøvande kunstnarar er fritekne frå avstandskravet på 1 meter når dei gjennomfører kulturaktivitetar i regi av ein profesjonell aktør, jf paragraf 13 i Forskrift om smitteverntiltak.
Emner
Kategorier
Det Norske Teatret er Noregs største teater for refleksjon, oppleving og underhaldning. Teateret ligg sentralt i hovudstaden i eit moderne teaterbygg frå 1985 med 3 faste scenar, og over 250.000 publikummarar årleg.
