Ronja Røvardotter som krigsbarn

Trass i ufred spirer leiken og håpet. Dette er utgangspunktet for regissør Catrine Telles versjon av Ronja Røvardotter.

RONJA RØVARDOTTER
av Astrid Lindgren
LAURDAG 4. MARS KL. 18.00
HOVUDSCENEN

- Barn over heile verda bur, veks opp og leikar i det som eigentleg er ein kulisse for krigshandlingar. Vi ser jo stadig vekk bilete i media av barn som finn tilbake til ein kvardag der alt er endra, seier Catrine Telle. I Ronja og Birk ser ho to representantar for forsoning i ei verd der generasjonen over ikkje klarer å finne løysingar.

Fedrane, Mattis og Borka, ligg i strid med kvarandre. Hatet mellom bandane deira er sterkt og ungane blir nekta kontakt. Men barn er barn, og livet må gå vidare. Håpet om ei framtid i fellesskap ligg i vennskapen mellom Ronja og Birk. Kva vil vinne fram – hatet eller kjærleiken?

Ambisiøst format

Scenograf Tore Sæther har forlate Mattisskogen. På scenen står ein ein utbomba by, der alle gjer så godt dei kan for å overleve med dei få ressursane som er igjen.

Scenografien fyller heile scenerommet i fleire etasjar og tek i bruk heile teatermaskineriet frå dreieskive til hemmelege rom i scenegolvet. Projeksjonar skapar ulike stader og stemningar. Kostyma ser ut som tøyrestar funne på søppelfyllinga. Her er blikkspann med varme, grådvergar som bur i eit gamalt bilvrak og villvetter med fleire meter lange vingespenn. Astrid Lindgrens vakre forteljing om venskap og håp blir fortalt med song og dans. Til å lydleggje det heile er musikken frå den originale Ronja Røvardotter-filmen, som foreldre- og besteforeldregenerasjonen nok vil kjenne igjen.

– Historia om dei to ungane er jo ikkje trist, seier Catrine Telle. Les heile intervjuet her.

Vennskap og håp

Medan verda brenn der ute, blir Ronja og Birk - barn av to familiar som ligg i bitter strid med kvarandre - venner. Dei trassar foreldras vilje, og deira modige val er med på å skape grobotn for fred mellom foreldra.

Sjå film frå prøvane.