Pressemelding -
Tilbake som Romeo og Julie nesten 40 år seinare
I 1985 spelte Svein Tindberg og Liv Bernhoft Osa rollene som Romeo og Julie i opningsframsyninga på Det Norske Teatret i Kristian IVs gate. Når Svein Tindberg i år når pensjonsalder og skal ha si avskilsframsyning, vil han igjen framføre Romeos kjærleikserklæring til Julie.
ROMEO OG JULIE
av William Shakespeare
PREMIERE FREDAG 13. JANUAR KL. 19.30
SCENE 2
Nesten 40 år etter at dei stod på scenen saman som Romeo og Julie, møtest Svein Tindberg og Liv Bernhoft Osa igjen i dei same rollene. I bagasjen har dei nesten ein heil menneskealder av erfaring. Regissør Erik Ulfsby ønskjer nemleg å utforske kva som skjer med Shakespeares tekst når den ligg i munnen til to erfarne skodespelarar. Det er likevel ikkje den aldrande kjærleiken som skal portretterast, det er den livsglade og spontant naive ungdomsforelskinga som framleis er kjernen.
- Røynde og eldre skodespelarar har også ein annan måte å handsame dynamikken i vers og få fram dei ulike laga som bur i dei, utdjupar Ulfsby, som også synest det er interessant korleis dei som er meir erfarne i livet og kjærleiken også vil kunne overføre noko av livsvisdomen dei har til rollene.
Liv Bernhoft Osa og Svein Tindberg som Romeo og Julie i 1985 og 2023. Foto: Morten Krogvold/Fredrik Arff.
LES MEIR: – Det var eit enormt press ved å vere dei første som snakka på den nye scenen, minnest Osa og Tindberg om da Det Norske Teatret opna med Romeo og Julie i 1985.
Omvendt alders-casting
I denne oppsetjinga skal ikkje berre dei eldre skodespelarane spele dei unge rollene, men også omvendt. Rolla som Fru Capulet, Julies mor, skal Gina Bernhoft Gørvell ha, som i det verkelege livet er dotter til Liv Bernhoft Osa. Men det finnest unntak. For eksempel vil ein ganske vaksen skodespelardebutant kle rolla som Fyrsten av Verona - nemleg gjendiktaren av Shakespeares tekst, Edvard Hoem.
Kjærleikserklæring til teateret
Dette er med på å bygge opp under eit anna perspektiv i denne framsyninga: Kjærleiken til teateret. Eller som Ulfsby seier det, eit teater som er i ferd med å forsvinne:
- Summen av verkemiddel som ein i dag har til rådvelde når ein lagar teater, gjer at fokuset på teksten kjem litt i bakgrunnen.
Derfor har Ulfsby valt å gi dei berande rollene til to røynde skodespelarar, begge med eit langt liv i teatret og med stor kjærleik til det.
Kva som også hender når to eldre skodespelarar gir liv til to så unge roller, gjenstår å sjå, når Romeo og Julie har premiere på den lagnadstunge dagen fredag den 13.
Related links
Emner
Kategorier
Det Norske Teatret er Noregs største teater for refleksjon, oppleving og underhaldning. Teateret ligg sentralt i hovudstaden i eit moderne teaterbygg frå 1985 med 3 faste scenar, og over 250.000 publikummarar årleg.
