Pressemelding -
Tindbergs siste Abrahams barn-framsyning som direktestrøyming
Abrahams barn er den vesle framsyninga som blei ein av teaterets største suksessar. Fredag framfører Svein Tindberg soloframsyninga for 350. og aller siste gong, og publikum kan oppleve hendinga over heile landet.
Direktestrøyming av ABRAHAMS BARN
av Svein Tindberg
FREDAG 9. JUNI KL. 19.30
I STOVA DI
Abrahams barn har hatt ei lang reise sidan premieren i 2011. Det byrja med eit oppriktig ønskje om å lage ei framsyning for å auke samforståinga mellom muslimar, kristne og jødar.
- Eg er eit teatermenneske, har vore det heile livet. Noko så spinkelt som ei teaterframsyning kan endre enkeltmenneske. Eg trur faktisk på at sanne møte mellom menneske kan endre oss, har Svein Tindberg sagt.
Teatersjef Erik Ulfsby gav han Scene 3 til rådvelde til prosjektet, og Tindberg sette i gong med arbeidet i lag med regissør Kjetil Bang-Hansen. Dei arbeida fram ei forteljande soloframsyning med innslag av spelescener, der Tindberg sjølv spelte alle rollene. Premieren var tenkt til hausten 2011. På Hovudscenen skulle ei meir bestialsk framsyning basert på barnerima om Shockheaded Peter ha premiere i august.
Datoen som endra alt
Men etter atterroren råka landet 22. juli, avgjorde teatersjef Ulfsby at det var umusikalsk å spele Shockheaded Peter - ei framsyning der ein skulle le av at barn fekk kutta av hendene for å ha leikt med saks. Men ei framsyning som ville gi kunnskap, skape samhald og forståing på tvers av religionar og ulike livssyn? Det var nett det Noreg trengte da. Abrahams barn blei flytt frå Scene 3 til Hovudscenen, og alle det 750 setene i salen var fylde kveld etter kveld. Året etter blei framsyninga heidra med den gjeve Heddaprisen for Årets framsyning.
Den lange reisa
Sidan har framsyninga vore på repertoaret til Det Norske Teatret, og har blitt spelt på alle dei fire scenene – Hovudscenen, Scene 2, Rommen Scene og Scene 3. I tillegg har Tindberg vore på turné i heile landet med Riksteatret, han har spelt Abrahams barn i Spania, framsyninga har blitt strøyma til heile landet under koronanedstenginga, Tindberg har gitt ut teksten som bok – og Stockholms Stadsteater har sett opp sin heilt eigen versjon. Over 100.000 publikumarar har fått oppleve framsyninga.
No er det tid for å sette endeleg punktum, og lukke alle dei tre bøkene. Og da høver det seg at publikum kan oppleve framsyninga anten dei sit i salen eller i sofaen heime i Målselv.
Related links
Emner
Kategorier
Det Norske Teatret er Noregs største teater for refleksjon, oppleving og underhaldning. Teateret ligg sentralt i hovudstaden i eit moderne teaterbygg frå 1985 med 3 faste scenar, og over 250.000 publikummarar årleg.