This web page requires JavaScript to be enabled.

JavaScript is an object-oriented computer programming language commonly used to create interactive effects within web browsers.

How to enable JavaScript?

Nyhendebrev: Billettsalet startar for Hans og Grete

Nyhet -

Nyhendebrev: Billettsalet startar for Hans og Grete

I dag startar billettsalet for den vakre, skumle, sjarmerande, morosame og gripande operaen Hans og Grete, etter Brødrene Grimm sitt eventyr. Her er garantert noko for ein kvar smak: først og fremst storslagen, romantisk musikk, dernest folkelege barnesongar vi kanskje har høyrt før, himmelsk ballettmusikk når dei fjorten englane kjem ned og vakar over borna i skogen, ei skikkeleg fæl heks i eit pepparkakehus i skogen, ei ond stemor, og framfor alt: modige born.

Operaen er både ein fullskala opera for vaksne, med "moden" musikk, men òg ein spennande opera for barn. Så her kan heile familien gå saman, sjølv om det nok kan bli litt for skummelt for dei aller yngste borna.

Det kunstnariske teamet og solistlaget vert sett saman i desse dagar -  enn så lenge har vi gleda av å presentere vår regissør, Jeff Pedersen frå USA, busett i Stongfjorden i Sunnfjord. Han driv sitt eige selskap, Jeff Pedersen Productions og er mykje nytta som  teaterregissør og kampsportinstruktør.  Det er ei stor glede å ha han med på laget, og vi gler oss til spennande samarbeid i det nye året!

                                                                                Jeff Pedersen

Hans og Grete hadde verdspremiere i Weimar i Tyskland Lille Julaftan 1893, dirigert av sjølvaste Richard Strauss, og operaen vart straks ein publikumssuksess for både vaksne og born.  Operaen er av dei kjæraste og meste spelte i operalitteraturen, og no er turen komen til Opera Nordfjord. Vi har ønskt å setje opp dennne operaen sidan vi starta opp i 1998. Etter 21 år er vi klare og gler oss til premiere onsdag 2. oktober og øvrige framsyningar 3., 5., 6., 8., 9.,11. og 12. oktober.

Vi ønskjer å takke våre medverkande solistar, musikarar, kor,  kunstnarisk team, alle frivillige og vårt PUBLIKUM for eit fantastisk jubileumsår - vi ser med stor glede tilbake på SCORE x 3 i mars, La Bohème x 8 i oktober og Annie x 4 i november, i alt 6800 publikummarar!  Velkomen tilbake til nye opplevingar i 2019, når vi feirar 10-årsjubiléet til Operahuset Nordfjord, vår kunstnariske "heim". Vi kan by på Fargespel Nordfjord 5., 6. og 7. april, Hans og Grete 2.-12. oktober og ein storslagen julekonsert i operahuset 6.- 8. desember. 

Billettane for dei to første produksjonane ligg no ute for sal,  sjekk www.operahuset.no.

Vi ønskjer alle våre vener ei riktig  god og fredfull julehøgtid og eit strålande fint kulturår!

Foto:Svein Nesbakk - frå musikaln Annie, med Michael Pavelich (Oliver Warbucks) og Sol Alme Brendefur (Annie)

Emner

Regioner


Opera Nordfjord vart starta i 1998 etter idé frå Kari Standal Pavelich og ektemannen Michael Pavelich, som framleis er sentrale i administrasjon og kunstnarisk leiing. Distriktsoperaen har sidan starten hatt store årlege operaproduksjonar på Nordfjordeid, takka vere omfattande dugnadsinnsats av ca. 200 frivillige. I tillegg til hovudproduksjonen om hausten turnerer Opera Nordfjord med eit nytt konsertprogram kvar vår til konsertstader på nordvestlandet. Samarbeid med andre aktørar står sentralt i operaen sitt virke, Eid vidaregåande skule er fast samarbeidspart i produksjon av kulissar og rekvisittar kvar haust, og Musikklinjekoret ved Firda vidarergåande skule har jamnlege konsertsamarbeid om våren. I tillegg er det eit utstrakt samarbeid med andre distriktsoperaer og Den Norske Opera & Ballett gjennom samproduksjonar eller utleige/lån av delproduksjonar. Familieproduksjonen vart innført i 2013 med balletten Nøtteknekkaren. Sidan har både The Sound of Music og Du er god, du, Charlie Brown fått god mottaking av publikum. Fast spelestad er Operahuset Nordfjord på Nordfjordeid, og administrasjonen har kontorstad i ærverdige Gamlebanken i Eidsgata.

Pressekontakt