Opera Nordfjord satsar stort med miljøopera, USA-turné og MATILDA!

Opera Nordfjord slår på stortromma og inviterer til eit innhaldsrikt og spennande år i 2025. Det startar friskt med to gjestespel i januar: komedien Scenbetennelse og familieoperaen Musikktyven, begge av Nils Harald Sødahl, og begge i samarbeid med Operahuset Nordfjord. I september blir det noregspremiere på miljøoperaen BLÅ, basert på boka av Maja Lunde, og i oktober blir det gjensyn med Soga om Sol – på engelsk – i operahuset, før heile ensemblet følgjer Sol på hennar reise til USA og feiring av Crossings 200, Utvandrarjubiléet. Året vert avslutta med brask og bram med familiemusikalen Matilda, med heile seks framsyningar i november-desember.

Noregspremiere på miljøoperaen BLÅ

Det er ikkje kvarsdagskost å lage opera i samarbeid med andre land, eller saman med klimafakultet og utanlandske masterstudentar. I 2025 skjer begge deler, når Opera Nordfjord i samarbeid med produksjonsselskapet SAUM i København og Høgskulen på Vestlandet ved masterprogrammet Climate Change Management legg krefter, evner og ressursar saman i eit spennande miljø- og kultursamarbeid utan sidestykke! Ved å kombinere operakunsten med norske litteratur, undervisning på dei vidaregåande skulane, forsking, vitskap og miljøkamp, kan store ting skje. Framsyningane vert etterfølgt av spennande debattar leia av mastersudentar frå fleire land. Etter premiere i København i mai blir det noregspremiere 2. september i Operahuset Nordfjord, etterfølgt av ein skulekonsertturné til utvalde vidaregåande skular og kveldsforestillingar til øvrig publikum til og med 12. september.

Soga om Sol med nypremiere og USA-turné

Etter suksessen med musikalen Soga om Sol i fjor, med bortimot utselde hus, blir det nypremiere på den engelske, reviderte versjonen 1. oktober i Operahuset Nordfjord med til saman fire framsyningar. Deretter pakkar heile ensemblet saman kostyme og instrument og set seg på flyet til New York for å delta på den offisielle feiringa av Utvandrarjubiléet, Crossings 200. Det blir framsyningar både i Sjømannskirken og Scandinavia House før vidare reise til fleire norsk-amerikanske miljø i Minnesota og Midtvesten; fleire spelestader kan komme til etter kvart som reiseruta vert lagt dei neste vekene.

Endeleg kjem MATILDA til Nordfjord

Etter å ha «stått i kø» sidan 2021, har Opera Nordfjord endeleg fått profesjonell lisens til musikalen Matilda! Det er stor stas og ei glede å sette saman kunstnarisk team og å innby til audition for både vaksenroller og barneroller. Store og små i alle aldrar kan berre begynne å gle seg til heile seks framsyningar i operahuset 28.-30. november og 5.-7. desember. 2025. Miss Thrunchbull lovar å gjere livert skikkeleg surt for skuleborna, men Matilda lovar å kjempe endå sterkare, med list og lempe, for det som er sant og rett, med alle sine gode hjelparar! Det kunstnariske teamet og info om audition vert kunngjort i januar.

Gratis musikkteaterskule i vinterferie og sommarferie

I tillegg til gode kunstnariske opplevingar på operascena og i kulturhus vert det arrangert gratis Musikkteaterskule fire dagar i vinterferien og seks dagar i sommarferien på Fjordane Folkehøgskule. Vårt dyktige, unge instruktørteam er på plass som vanleg – følg med på heimesidene for meir info etter kvart.

Velkomen til eit innhaldsrikt kulturår for store og små, som startar allereie i januar i samarbeid med Operahuset Nordfjord, med to gjestespel: Scenebetennelse - om opera og sånt og Musikktyven, gratis syngespel for heile familien!

Meir info og billettar: www.operanordfjord.no