Pressemelding -
Ny bok om det tragiske forholdet menneska har til naturen
Thor Magnus Tangerås er tilbake med ei ny diktsamling; Landskap med vindturbinar. Tangerås gjev ord til dei stemmelause, og vil gjennom dikta ta språket attende frå dei han meiner omskriv sanninga. Vi elskar den urørte naturen, og likevel øydelegg vi han. Vi treng han til å driva intensivt jord- og skogbruk, til bygging av vegar og hyttefelt - og til vindkraft. Vi kallar det «arealregulering». Og sjølv om vi prøver å snu utviklinga, vert landskapet forvandla. Villmark vert til illmark, og artar døyr. Vi kallar det «eit grønt skifte». Korkje reinsdyr, bekkar, fuglar eller planter kan setta seg opp mot inngrepa og overgrepa. Tangerås spør gjennom dikta; kan vi protestera mot oss sjølve? Eller må vi berre sørga i sympati med andre skapningar?
Dette er dikt om framandlekamar i jordkroppen. Om landskap med vindturbinar. Om sprenging i fjell og punktering av myrar. Om det tragiske forholdet menneska har til naturen.
Lansering på Norli Per Magnussen i Oslo 7. mars: https://www.facebook.com/event...
Thor Magnus Tangerås (f. 1972) kjem frå Haugalandet. Han er førsteamanuensis ved Westerdals institutt for kreativitet, forteljing og design ved Høyskolen Kristiania. Tangerås forskar på korleis litteraturen kan forandra oss, og har mellom anna gitt ut boka Literature and Transformation. A Narrative Study of Life-Changing Reading Experiences (Anthem Press, 2020). Han debuterte med diktsamlinga Ø i 2022. Landskap med vindturbinar er den andre diktsamlinga hans.
Emner
Det Norske Samlaget er eit kultur- og kunnskapsforlag som gir ut litteratur på nynorsk. Vi gir ut omlag 100 titlar kvart år av norsk og omsett skjønnlitteratur, barne- og ungdomsbøker, dokumentar- og faktalitteratur, ordbøker og læremiddel for høgare utdanning.
