Pressemelding -
Ny roman om kva som kunne skjedd om tyskarane vann andre verdskrigen
I den nye romanen Olga Bjoners plass tek Jørgen Norheim utgangspunkt i kva som kunne skjedd om tyskarane hadde vunne andre verdskrigen.
Lansering 5. september på Sollia krigshistoriske museum https://www.sollia.net/boklans...
Året er 1967, og Quisling og NS styrer i Noreg. Førarens høgre hand, parti- og statsminister Stein-Ulf Bru, har nok å hengje fingrane i. Den noko demente Vidkun Quisling fyller 80 år, og Tysklands nye førar Albert Speer er ventande til Noreg for å opne Polarbanen Nidaros–Kirkenes, som endeleg er ferdig. Minister Bru får ansvaret for planlegginga og gjennomføringa av Speers besøk, og tryggleiken står i sentrum. Då passar det dårleg at ei gruppe aksjonistar i ly av nattemørkret skiftar ut gateskilt med namn på fortente NS-folk med namn på motstandsfolk frå krigen.
I denne kontrafaktiske romanen teiknar Jørgen Norheim eit truverdig bilete av korleis livet her heime kunne ha arta seg dersom utfallet av andre verdskrigen hadde vorte eit anna og NS hadde fått styre i Noreg – ein skremmande visjon.
Jørgen Norheim (f. 1952) har sidan debuten i 1994 gitt ut fleire kritikarroste romanar. Adjutanten (2008) blei nominert til Brageprisen og Ingen er så trygg i fare (2002) blei nominert til Nordisk Råds litteraturpris. Olga Bjoners plass er den sjette romanen hans. Norheim er fødd i Sollia i Østerdalen og voks opp i Vestre Slidre. No bur han i Berlin.
Emner
Det Norske Samlaget er eit kultur- og kunnskapsforlag som gir ut litteratur på nynorsk. Vi gir ut omlag 100 titlar kvart år av norsk og omsett skjønnlitteratur, barne- og ungdomsbøker, dokumentar- og faktalitteratur, ordbøker og læremiddel for høgare utdanning.
