Odd Nordstoga aktuell med songbok for barn og miniturné

Odd Nordstoga er aktuell med songbok for barn, Song for deg og meg. Han reiser på miniturné og held gratiskonsertar på litteraturhusa i Oslo, Fredrikstad og Bergen dei kommande vekene. Nordstoga er redaktør for boka og har gjort eit breitt utval alle songglade vil ha stort utbyte av.

Boka er ein songskatt for born i alle aldrar, både i førskule og barneskule. Her er eit godt utval av songar på nynorsk og dialekt, både dei gamle, gode norske songane, moderne viser og folkeviser, stev og stubbar, nyare songar, songar til skjemt og høgtid. Her er songar frå den tradisjonsrike, gamle songskatten frå Vinje, Garborg og Sivle, men også nyskrivne melodiar til både eldre og nyare, kjende og ukjende tekstar. Utanlandske songar er omsette, og ikkje minst inneheld boka fleire songar som har vorte store slagerar. Fleire av Nordstoga sine eigne populære songar er også med.

Songane er illustrerte med omtanke og teft av Hilde Hodnefjeld og Inger Lise Belsvik. Dette er ei ny og utvida utgåve av Songbok for deg og meg som kom i 2002.

Turnéen, Litteraturhusa i:  Oslo 1.3. kl 13, Fredrikstad 2.3. kl 13. og Bergen 8.3. kl 13. - gratis inngang.

Odd Nordstoga (1972) er musikar, artist og forfattar. Barn kjenner musikken hans mellom anna frå kjende seriar på barne-TV. I 2004 fekk han Spellemannsprisen for plata Luring, og har skrive ei rekkje populære songar for både born og vaksne.