Ragnhild Kolden klar med "Fredens frosne hjarte" - siste bok i sterk krigstrilogi

Ragnhild Kolden er aktuell med den tredje og avsluttande romanen i sin sterke krigstrilogi, Fredens frosne hjarte. Boka vert lansert på Diktardagar i Lom, Skjåk og Vågå 8.-10.8.

Mai 1960. Krigen har vorte fjern og kan nesten synast gløymd. Krigsrøynslene har vorte til ein bleik, taus understraum i livet til Dagny Vik. Men då Hermod Austo finn restane av eit lik inne i fjellet og kunstmålaren Bentein kjem til bygda, er krigens påtrengjande nærver der att – fullt av løyndomar og uoppgjorde synder.

Med Fredens frosne hjarte avsluttar Ragnhild Kolden sin kritikarroste krigstrilogi om søstrene Vik. Første og andre band i serien heiter I krig og kjærleik og Krigens skugge.
Ragnhild Kolden (f. 1956) er frå Bøverdalen i Lom og bur i Oslo. Ho debuterte i 2010 med romanen I krig og kjærleik. Kolden har også skrive kriminalromanar saman med Vigdis Kroken.

Sagt om Fredens frosne hjarte: 

"Boka viser solid forfattarhandverk, språket er kreativt og rikt på nyansar. Korte, spissa formuleringar skaper driv og energi, og syg lesaren inn".

May Grethe Lerum, VG (terningkast fem)