Pressemelding -
Kathrine Nedrejords personlege mareritt til scenen
- Dessverre er dette ei historie som millionar av kvinner i verda kan kjenne seg igjen i, seier regissør Julia Marko-Nord. Ho skal sette i scene Kathrine Nedrejords rasande forteljing om tida etter ei sjølvopplevd valdtekt.
FORBRYTAR OG STRAFF
av Kathrine Nedrejord
URPREMIERE FREDAG 7. FEBRUAR KL. 19.30
SCENE 2
PREMIERESAMTALE KL. 18.30
Kathrine Nedrejord i samtale med Siri Ramberg
- Det er ingen som er så opptatt av overgriperens stemme, voldtektsmannens versjon som kunstnerne. Det er ingen som er så lei av lov og rett, svart på kvitt, godt mot ondt som kunstnerne. Det passer ikke deres posisjon på kanten, skriv forfattar Kathrine Nedrejord i romanen Forbryter og straff, som blei nominert til Nordisk Råds litteraturpris i 2023.
Påstanden er så skarp at ho sjølv ikkje lenger trur ho er kunstnar. Den brutale overfallsvaldtekten ho opplevde på veg heim frå ein fest, har tvinga ho over på den andre sida.
Sinne og sorg
- Heile framsyninga er ei form for sorgarbeid. Det handlar om hemn, vreide og kraft. Ikkje tilgjeving, seier regissøren for framsyninga, Julia Marko-Nord.
Hovudkarakteren i stykket vil ikkje teie og leve i skammen lenger. Ho vil fortelje, og plassere skulda der den høyrer heime.
9% av norske kvinner opplever å bli valdteken ein eller fleire gonger i livet, så dette er eit tema mange vil vere berørte av direkte eller indirekte. Saman med skodespelar Kirsti Refseth ønsker regissøren å skape eit slags reinksande rituale som publikum kan bli med på.
Kvifor?
Forfattar Nedrejord har skildra tida etter ei overfallsvaldtekt. I dette litterære saksinnlegget går ho i rette med samtidas haldningar til offer og overgripar, skuld og rett. Vi møter ei kvinne som ikkje søv, som ikkje er trygg, som ikkje fungerer i kvardagen og arbeidslivet, og som er fylt av hat over det Han har gjort mot henne. Ho – og alle dei andre millionane av kvinner som er utsette for liknande overgrep – treng tilfredsstillande svar på kvifor.
Vil vaske vekk skamma
Svaret på det spørsmålet, får dei færraste. Men med framsyninga håpar Marko-Nord og Refseth å kunne hjelpe til å vaske skamma bort frå offeret.
- Kanskje nokon vil gå herifrå og skilje seg eller anmelde nokon. Eg vil at framsyninga skal gi kraft, seier Marko-Nord.
Premieresamtale
Før premieren vil forfattar og nyslått Brageprisvinnar Kathrine Nedrejord møte til ein samtale med Det Norske Teatrets dramaturg Siri Ramberg.
Related links
Emner
Kategorier
Det Norske Teatret er Noregs største teater for refleksjon, oppleving og underhaldning. Teateret ligg sentralt i hovudstaden i eit moderne teaterbygg frå 1985 med 3 faste scenar, og over 250.000 publikummarar årleg.
