Pressemelding -
Kritikarrost framsyning som direktestrøyming
2021 blei ikkje det store teateråret vi hadde håp om. Det Norske Teatret produserte likevel nokre fantastiske framsyningar som diverre har nådd eit altfor lite publikum. Ein av desse er Lehmantrilogien som fekk Noregspremiere i august, til strålande kritikkar, men som både blei råka av streiken i kultursektoren og nye restriksjonar. Vi er derfor utruleg stolte over å kunne tilby Lehmantrilogien i direktestrøyma versjon laurdag 15. januar.
LEHMANTRILOGIEN
av Stefano Massini
LAURDAG 15. JANUAR KL. 16.45
I STOVA DI
Lehmantrilogien handlar om dei tre brørne Lehman som kom til USA midt på 1800-talet og som stein på stein bygde verksemda som ved milleniumsskiftet utgjorde investeringsbanken Lehman Brothers. Framsyninga er både eit familiedrama og ei forteljing om immigrasjon, men også ei historie om det amerikanske samfunnet og vestleg kapitalisme. Vi følgjer oppbygginga frå forretninga i Alabama i 1840-åra til kollapsen på New York børsen i 2008. Det er fascinerande, velspelt og eit drivande godt drama.
Den italienske forfattaren Massini har gjort dette til ei episk forteljing som rommar historia om den amerikanske draumen, om familieband, generasjonskløfter og stormannsgalskap. Eit sterkt ensemble under regi av Maren Bjørseth går inn og ut av forteljarrolla og eit utal karakterer gjennom dei 3,5 timane (inkludert 2 pausar) framsyninga varar. Når lyset går av, har ein vore igjennom 3 generasjonar Lehman, 4 tidsepokar, og banken har gått både på børs og konkurs.
Les meir: – Eg har ikkje investert meir enn eg toler å tape, seier Christian Ruud Kallum om sine ferske økonomiske disposisjonar. I haust skal han portrettere ein langt meir risikovillig finansmann. Interessa for aksjar kom som eit direkte resultat av arbeidet med rolla som Robert «Bobbie» Lehman.
Håpar å nå fleire
- Ved å direktestrøyme Lehmantrilogien håpar vi å nå ut til mange som vil ha glede av å sjå denne sterke teaterframsyninga. Av logistikkmessige omsyn kan diverre ikkje Lehmantrilogien bli vist lenger enn oppsett tid, seier teatersjef Erik Ulfsby. 15. januar er altså siste moglege dato for å få med seg framsyninga, anten i salen eller på ein skjerm.
Skodespelarar
Related links
Emner
Kategorier
Det Norske Teatret er Noregs største teater for refleksjon, oppleving og underhaldning. Teateret ligg sentralt i hovudstaden i eit moderne teaterbygg frå 1985 med 3 faste scenar, og over 250.000 publikummarar årleg.
