Pressemelding -
Tolvskillingsoperaen - der det meste er til sals!
Kva gjer det med oss menneske når alt er til sals, korleis ser vi på vår neste? Som ein... ting? Og kva om denne neste faktisk ER ein ting?
TOLVSKILLINGSOPERAEN
av Bertolt Brecht med musikk av Kurt Weill
PREMIERE LAURDAG 14. NOVEMBER KL. 18.00
PÅ HOVUDSCENEN
Brecht og Weills Tolvskillingsoperaen var eit tidleg forsøk på teater der politikk, eventyr og musikk gjekk opp i ei større kunstnarleg eining. Regissør Tore Vagn Lid har med seg eit knallsterkt ensemble av menneske, robotar og fullt orkester når han utforskar det han sjølv karakteriserer som ei filosofisk røvarhistorie. Blikket er retta mot framtida. På scenen ligg ein havarert buss (for tog) og blant spelarane inngår både smarte apparat og menneskeliknande avatarar. I dette landskapet er det vanskeleg å finne ei fri strandsone og ein må komme seg stadig høgare for å få tilgang til kostbar snø.
Smuldrande velferdsstat
Regissør Tore Vagn Lid og scenograf og videodesignar Kyrre Bjørkås ser Tolvskillingsoperaen som eit eventyr om eit lite land langt nord. Kongen er gamal, og marknadskreftene held på å ta over restane av ein smuldrande velferdsstat. Fjellheimen og nasjonalparkane er blitt private hyttefelt eigde av konglomerat og konsern frå heile verda. Arbeidsoppgåvene er tatt meir og meir over av menneska sine intelligente løysingar, og avatarane har rykka inn - ikkje minst i teatret. Dei treng ikkje kvile eller mat, og seier heller aldri nei.
Kyrre Bjørkås (scenograf og videodesignar) og Tore Vagn Lid (Regi, konsept og musikalsk ansvarleg). Foto: Maiken Mathisen.
Politikk og moral
Regissør Tore Vagn Lid har tidlegare hausta både Heddaprisar og Kritikarprisen for oppsetjingane sine, som gjerne tek for seg korleis samfunnsendringar og politikk verkar inn på den einskildes liv og moral. Slik er det også her med Brechts Tolvskillingsoperaen.
Kunstig intelligens som har tatt over dei fleste arbeidsområde i Tolvskillingsoperaen. Robotar som er grenselause og aldri seier nei.
- Framsyninga kan kanskje sjåast som ei filosofisk røverhistorie om ei ny verkhelegheit. Når omsetjing av sex-dokker alt har vist seg som ein moralsk og økonomisk «game-changer», og dei tradisjonelle prostituerte har byrja å mane til opprop mot desse nye kollegaene, kva da med tiggarmarknaden?, spør regissøren.
Moderne Tolvskillingsopera
Tolvskillingsoperaen gir ein skarp analyse av ein framstormande kapitalisme med sin vekst- og varelogikk. Det er i denne marknaden den lyssky businessmannen Peachum og den notoriske forbrytaren Mackie Kniven opererer. Peachum driv saman med kona og dottera Polly ei lukrativ verksemd, der alle tiggarane i byen er tilsette. Når Mackie forfører den "uskuldige" Polly er det duka for dramatikk...
LES OGSÅ: - Eg har alltid vore glad i musikk, og musikalmusikk er noko heilt for seg sjølv, seier Ina Svenningsdal, som mellom andre skal spele tiggaren Filch.
LES MEIR om Tolvskillingsoperaen på Det Norske Teatret sine nettsider.
Emner
Kategorier
Det Norske Teatret er Noregs største teater for refleksjon, oppleving og underhaldning. Teateret ligg sentralt i hovudstaden i eit moderne teaterbygg frå 1985 med 3 faste scenar, og over 250.000 publikummarar årleg.
