Gå videre til innhold
Ein gruppe barn løper på gras.
Ein bør vurdere å endre anbefalingane om fysisk aktivitet for barn, meiner NIH-forskarar. Mellom anna på grunn av ein stor internasjonal studie leia frå Norges idrettshøgskole. Foto: Colourbox.

Pressemelding —

Ny stor studie utfordrar dagens aktivitetsanbefalingar for barn: – 60 minutt kan vere for lite

Ein stor internasjonal studie har undersøkt samanhengen mellom barns og unges aktivitetsnivå og risikomarkørar for hjartehelse. Forskarane meiner funna bør få helsemyndigheitene til å vurdere ei endring av dagens aktivitetsanbefalingar.

60 minutt med aktivitet med moderat til høg intensitet kvar dag, er det helsemyndigheiter både nasjonalt og internasjonalt tilrår barn frå 6 til 17 år i dag.

Men er det eigentleg nok?

Forskarar ved NIH har gjort ein stor oversiktsstudie der dei har sett på 14 internasjonale oppfølgingsstudiar, og undersøkt samanhengen mellom fysisk aktivitet og stillesittande tid med ulike markørar for hjarte- og karhelse.

Den største studien

Nærmare 13.000 barn og unge frå 16 forskjellige land og fire kontinent er inkludert. Ingen har tidlegare gjort ein så stor og liknande studie der aktivitetsnivået til barn har blitt målt med bevegelsessensorar (akselerometer).

– Dette er den beste og mest omfattande studien som hittil er gjort på dette området, seier professor Ulf Ekelund, som er ein av dei mest anerkjente forskarane innanfor folkehelse og fysisk aktivitet internasjonalt.

POrtrett Ulf
Ulf Ekelund er professor ved Institutt for idrettsmedisinske fag ved NIH.

Funna viser også at det viktigaste du som forelder kan gjere er å legge til rette for at barna blir andpustne i løpet av dagen.

  • Fysisk aktivitet med moderat til høg intensitet (rask gåing til aktivitet der du blir andpusten og sveitt) har ein svak, men gunstig samanheng med markørar for hjarte- og karhelse (som insulin, LDL-kolesterol, triglyserider og ein samla risikoscore).
  • Forskarane fann ingen samanheng mellom total mengde stillesittande tid og dårlegare risikoprofil for hjarte- og karhelse blant unge.
  • Fysisk aktivitet med moderat til høg intensitet over dagens anbefaling (60 minutt per dag) må kanskje til for å forbetre helsetilstanden til hjarte blant unge.

Endre til 90 minutt kvar dag?

– Dette tyder på at det viktigaste er å sikre at barn får opp pulsen ein stund per dag, og at stillesitting i seg sjølv ikkje er ein sjølvstendig risikofaktor for hjartehelsa hos barn, seier Anders Husøy ved Institutt for idrettsmedisinske fag på NIH, ein av forskarane bak rapporten.

barn klatrer opp ned
Studien er unik fordi ein har målt aktiviteten til barn med bevegelsessensorar, og fylgd barna over fleire år. Foto: Colourbox.

Grunnen til at forskarane meiner at aktivitetsanbefalinga kan bli høgare, er at dei såg i studien at det berre var dei mest aktive barna som hadde ein lågare sannsynlighet for høgare risikoscore for hjarte- og karhelse.

– Dei som låg i denne gruppa hadde 92,8 minutt per dag i gjennomsnitt. Det kan tyde på at anbefalinga burde ligge i nærleiken av 90 minutt per dag, seier Husøy.

Portrett Anders
Anders Husøy er førsteforfattar på studien. Han forskar på fysisk aktivitet, stillesitting og folkehelse på NIH.

Tilpasse aktivitetsråda til alder

Dei etablerte råda om 60 minutt kvar dag kom i 1998. Ekelund meiner det er på høg tid for WHO å endre råda.

Sidan 1998 har det kome fleire og langt betre studiar på området.

– Dei etablerte råda er i stor grad bygd på eldre tverrsnittstudiar og det var berre tre studiar som hadde faktiske målingar av blodtrykk og blodmarkørar, seier Ekelund.

Han meiner også helsemyndigheitene bør vurdere eigne aktivitetsanbefalingar for ulike aldersgrupper. Samanhengen mellom aktivitetsnivå og risikomarkørar for hjarte- og karhelse var sterkast hos dei yngre gruppene med barn.

– Nå spekulerer eg litt, men eg tenkjer at den anbefalinga som finst i dag frå 6 til 17 år, er eit altfor breidt aldersspenn. Eg trur ein burde ha ei anbefaling frå 6 til 11–12 år og ein for ungdom, seier Ekelund.

Forskarane understrekar at det krev meir forsking for å kunne konkludere med sikkerheit, mellom anna fordi barn i tenåringsalder endrar seg fort på mange måtar.

Denne gruppa er aktivitet viktigast for

I studien såg dei også at det var eit sterkare forhold mellom fysisk aktivitet og markørane for betre hjarte- og karhelse blant dei med høgast BMI.

– Det tyder på at fysisk aktivitet er mest gunstig og viktig for akkurat denne gruppa.

Forskarane understrekar at i denne studien har det berre blitt sett på nokre av mange helsemarkørar.

– Det er sjølvsagt ein liten del av barns helse. Fysisk aktivitet gjer utruleg mykje anna bra for barn som denne studien ikkje har målt – slik som betre kognitiv funksjon og læring, betre psykisk helse og trivsel, sterkare skjelett og fysisk form, seier Jakob Tarp, som også er ein del av forskargruppa på NIH bak studien.

Les heile artikkelen som er publisert i det anerkjente tidsskriftet Jama Pediatrics her

Emner

Kategorier


Norges idrettshøgskole er en vitenskaplig høgskole med et særlig ansvar for forskning og høyere utdanning innen idrettsvitenskap. Vi er rangert som nummer to i verden på den årlige Shanghai-rankingen. Forskningen vår dekker et bredt spekter innenfor idrettsvitenskap og folkehelse, fra forskning på blant annet eldre, gravide og barn, til toppidrett.

Kontakter

Relatert innhold

  • Ny studie: Korte gåturar og mindre stillesitting gir lågare dødsrisiko

    *SPERREFRIST: 14.JANUAR 00:30 (NORSK TID).* Å gå fem ekstra minutt kvar dag eller å redusere stillesittinga med ein halvtime kvar dag, reduserer dødsfall blant dei fleste vaksne, viser ny NIH-leia studie.
    Studien, publisert i det internasjonalt anerkjente tidsskiftet “The Lancet”, analyserte aktivitetsnivået til meir enn 135 000 vaksne I Norge, Sverige, Storbritannia og USA.
    – Resultata våre

    Nordic walking in the snowy winter park. Senior wo men working out Nordic walking.
  • Nye funn: Musklane hugsar periodar med inaktivitet

    Periodar med inaktivitet kan sette varige spor, viser ny forsking på muskelminne på NIH. For deg som starta med trening som ung, har forskaren gode nyheiter, men det er heller ikkje for seint å starte.

    Mann som ligger på sofa