Alfred Fidjestøls biografi om Georg Johannesen nominert til Brageprisen i sakprosa

Alfred Fidjestøls bok Innerst i hjertet har jeg min forstand: biografien om Georg Johannesen, kom ut i september til stålande kritikkar og er no nominert til Brageprisen i klassen sakprosa.

Frå juruens grunngjeving: "Mange års arbeid med biografien om Georg Johannesen ber no frukter. Med sine omfattande kunnskapar og suverene evne til å skrive godt og underhaldande, har Alfred Fidjestøl greidd å gjere den innhaldsrike forteljinga om poeten, kunstnaren og den kvasse og samfunnskritiske retorikaren Georg Johannesen til eit heilstøypt litterært verk. Gjennom ei rein og kronologisk historielinje, frå oppvekst og fram til Johannesen døyr i 2005, framkallar Fidjestøl eit skarpt, detaljert, fargerikt og høgst levande bilete av eit komplekst liv og virke. Forteljinga om Georg Johannesen har gjennomslagskraft til å kunne nå mange ulike lesarar. Det er til dømes nyttig stoff å finne for den litteraturhistorieinteresserte, for den debattglade og for den generelt leselystne – og hos alle med ein flik av opprørar i seg vil innhaldet slå inn med forfriskande kraft. Slik vil denne store og nyanserte biografien vere aktuell og meiningsfull også for yngre lesarar. Georg Johannesen var ein ruvande personlegdom i si tid og laga av eit stoff som knapt lenger finst. Han fortener til fulle den kraftfulle bautaen Fidjestøl på imponerande vis reiser i ein gjennomarbeida, påkosta og rikt dokumentert biografi."