Pressemelding -
Hardtslåande diktsamling frå den prisvinnande amerikanske poeten Terrance Hayes ute på norsk
Den prisvinnande amerikanske poeten Terrance Hayes er ute på norsk med diktsekvensen Amerikanske sonettar til min fortidige og framtidige snikmordar.
Som svart mann i dagens USA har Terrance Hayes inngåande kjennskap til det konstante trugsmålet om rasistisk vald. I denne diktsamlinga teiknar han det skjøre omrisset kring spørsmål om rase, kjønn og undertrykking med utgangspunkt i samtidas politiske situasjon. Han trekker også linjene bakover gjennom USAs rasistiske og valdelege historie, samtidig som han koplar på både den klassiske og den moderne litteraturen.
Gjennom 70 sonettar vekslar Hayes mellom knallhard realisme og rørande visjonar, frå blodig alvor til underfundig humor. Innimellom set han fingeren på det vakre i det nesten banale, innimellom blir dikta meir introspektive og krinsar kring forholdet mellom far og son.
Gjendikta frå amerikansk ved Ida Hove Solberg og Sofia Knudsen Estifanos.
Terrance Hayes (f. 1971) er blant dei mest markante poetane i USA i dag. Han er opptatt av populærkultur, rasespørsmål, musikk og maskulinitet, og sidan debuten i 1999, Muscular Music, har han gitt ut seks diktbøker og éi essaysamling. Hayes har mottatt ei røys med prisar, nominasjonar og utmerkingar, mellom anna National Book Award i 2010 for Lighthead. Amerikanske sonettar til min fortidige og framtidige snikmordar er den første boka hans som blir gjendikta til norsk
Emner
Det Norske Samlaget er eit kultur- og kunnskapsforlag som gir ut litteratur på nynorsk. Vi gir ut omlag 100 titlar kvart år av norsk og omsett skjønnlitteratur, barne- og ungdomsbøker, dokumentar- og faktalitteratur, ordbøker og læremiddel for høgare utdanning.
