Marianne Gretteberg Engedal aktuell med oppfølgjar til prisvinnande og kritikarrost bildebok

Marianne Gretteberg Engedal er aktuell med ny bildebok om Kjell og bestevennen Pølse-Per i oppfølgjaren Polititjuven, og allereie før lanseringa i Noreg er rettane seld til Danmark og Sverige!

Kjell er fødd inn i ein tjuvefamilie, men er ikkje tjuv lenger. Det er ingen i verda Kjell likar så godt som Pølse-per, og det er ingenting i verda Pølse-Per likar så godt som pølser. Men rett før skulen skal på overnattingstur i skogen, flyttar det ein politifamilie til byen. Politijenta Perit skal bli med på skuleturen, og for Kjell endrar alt seg når ho stel bestevennen hans, Pølse-Per.

Polititjuven er ein humoristisk og fantasifull bildebok om sjalusi og fordomar.

I Polititjuven møter vi att Kjell, som vi blei kjende med i Pølsetjuven frå 2019. Pølsetjuven vann Kulturdepartementets bildebokpris 2019 og Nynorsk barnelitteraturpris. Boka er omsett til fleire språk og sett opp som teater på Den Nationale Scene i Bergen.

Marianne Gretteberg Engedal (f.1986) er illustratør og kokk frå Haugastøl, utdanna ved Kunsthøgskulen i Bergen. Ho har illustrert fleire bøker for barn og unge.