Pressemelding -
Sprudlande diktsamling for barn og vaksne i alle aldrar signert Sigmund Løvåsen
Har du kinesisk jern i blodet? Er det tisset til Jesus du drikk? Er spyfluga glad i spy? Og har du eigentleg Europas største stortå? Bli med inn i boka og ut på oppdagingsferd!
Tusen elgar i garasjen er den første diktsamlinga for barn frå poet, forfattar og biograf Sigmund Løvåsen. Dette er ei samling leikne og morosame dikt for store og små, som byr på undring og humor.
Boka er illustrert av Hilde Hodnefjeld.
Sigmund Løvåsen (f.1977) er frå Trysil og er busett på Svartskog. Han har studert ved forfattarstudiet i Bø og Litterär Gestaltning i Göteborg. I tillegg til å vere forfattar er han leiar av Kulturrådet og Forfattarskulen for skrivande med minoritetserfaring. Han debuterte med romanen Nyryddinga i 2003, og vann Tarjei Vesaas’ debutantpris og P2-lyttaranes romanpris for denne. Han debuterte som barnebokforfattar i 2021. Tusen elgar i garasjen er den første diktsamlinga hans for barn.
Lansering på biblioteket i Trysil 18.april.
TUSEN ELGAR I GARASJEN
Løvetanna og røyksoppen er smarte.
Dei er laga slik at det er gøy å spreie frøa deira.
Slik kan dei bli så mange.
Når du tråkkar på røyksoppen, så fer det ut frø i den brune røyken.
Løvetanna kan du plukke når ho har visna og er kvit i luggen.
Når du blæs på henne, gir du mamma gule blomar over heile hagen neste år.
Da blir ho glad.
Tenk om du kunne blåse på ein vissen elg slik at det kom hundre nye elgar.
Tenk om du kunne tråkke på mamma slik at det kom femti nye babyar.
Det er bra mamma ikkje er som ein røyksopp.
Og tenk kor mange elgar det ville bli om elgen var som ei løvetann.
Oi, ville mamma og pappa seie,
vi har hundre babyar i stua og tusen elgar i garasjen.
Emner
Kategorier
Det Norske Samlaget er eit kultur- og kunnskapsforlag som gir ut litteratur på nynorsk. Vi gir ut omlag 100 titlar kvart år av norsk og omsett skjønnlitteratur, barne- og ungdomsbøker, dokumentar- og faktalitteratur, ordbøker og læremiddel for høgare utdanning.
