To nye bøker om og med Sissel Solbjørg Bjugn

Samlaget lanserer to bøker om og med Sissel Solbjørg Bjugn (1947-2011). Bjugn var poet, barnebokforfattar, illustratør, radikal religiøs og samfunnsengasjert. Bjugn var ein nyskapande forfattar og fornyar av den norske surrealismen. I Skrive, teikne, røre og slåst! Av og om Sissel Solbjørg Bjugn teiknar Tor Eystein Øverås eit portrett av henne basert på eit rikhaldig arkiv og intervju med personar som kjente og samarbeidde med henne. Einar Økland har skrive forord til boka Sjonglering og bjugnlering. Dikt og tekstar i samling 1972-1999.

Meir om bøkene:

Skrive, teikne, røre og slåst! Av og om Sissel Solbjørg Bjugn

Tor Eystein Øverås (red.)

Tor Eystein Øverås presenterer den nyskapande forfattaren, fornyaren av norsk surrealisme og vennen Sissel Solbjørg Bjugn. Boka er både ein biografi over Sissel Solbjørg Bjugn og ein presentasjon av Bjugns eigne tankar om skriving og litteratur. Tor Eystein Øverås har leita fram alt Sissel hadde på trykk i aviser, tidsskrift og antologiar, og dessutan alle intervju ho gav. Utvalet han presenterer i denne boka, viser fram ein særeigen og kresen poet, eit eruptivt skapande sinn, som samtidig blei styrt og filtrert av eit strengt sjølvkritisk blikk. Boka viser også fram ukjende sider ved teiknaren Bjugn. Bjugn var samansett både som menneske og som kunstnar. Ho vandra mellom skrivebordet og skriftestolen, til ho braut med den katolske kyrkja fordi kyrkja nekta å sleppe til kvinnelege prestar. Ho melde seg inn i statskyrkja igjen då Rosemarie Köhn blei Noregs første kvinnelege biskop. I 1988 blei ho landskjend då det erotiske kjærleiksdiktet «Heltinnetrinnet» blei trykt på kronikkplass i Dagbladet. Aller helst ville Bjugn ha vore salmediktar eller rockeartist. 

Tor Eystein Øverås (f. 1968) debuterte i 1993 med romanen Tittelløs. Han gjekk på Skrivekunstakademiet i Hordaland før han fullførte hovudfag i litteraturvitskap ved Universitetet i Bergen. Øverås var også redaktør for litteraturtids- skriftet Vinduet 1998–99. Frå 2006 har han vore litteraturmeldar i Klassekampen og Morgenbladet, og i 2009 blei han utropt til Årets kritikar. For essaysamlinga I dette landskap (2012) blei han nominert til Brageprisen. Øverås har kjent Bjugn sidan 1994 og forvaltar i dag forfattarskapen hennar. 

Sjonglering og bjugnlering. Dikt og tekstar i samling 1972-1999

Sissel Solbjørg Bjugn

Frå tidleg i 1970-åra markerte Sissel Solbjørg Bjugn seg med djupt originale
og intellektuelt språkleikande tekstar.

Det har knapt komme noko frå Bjugn si hand som ikkje er eigenarta, ja beint fram avstikkande. Ho eksperimenterte med montasjar, typografiske figurdikt og tekstar der ho uredd fletta inn sine eigne sofistikerte blyantteikningar. Ho blei ein fornyar av den norske surrealismen gjennom sprelsk og uhøgtideleg omgang med tradisjonell og modernistisk poesi. For debutsamlinga Den første avisa på Lofotveggen (1978) fekk ho Tarjei Vesaas’ debutantpris. Bjugns tekstar er ofte eg-sentrerte, med markant intellektuelt drag og flittig bruk av ekte og mindre eksakte sitat og allusjonar – frå bibelske, litteraturteoretiske og filosofiske tekstar til slager- og rocketekstar.

I denne boka er dei seks bøkene ho gav ut for vaksne, samla: Den første avisa på Lofotveggen (1978), Spenn beltet kring livet og hald lampa tend! (1981), Den magre narsissisten (1984), Bye, bye (1989), Tornekysset (1992) og Depp (1999).
Forord ved Einar Økland.