Pressemelding -
Ny bok om det legendariske bandet Vinskvetten
Claus Sellevoll og Knut Arvid Langeland står bak ei ny bok om det legendariske vestlandsbandet Vinskvetten som kjem ut denne veka; Vinskvetten 50 år. Humor på ramme alvor.
Vinskvetten, også kjent som Salhus Vinskvetten, har fått vestlendingar til å gapskratta i 50 år. Songar som «Fergebilletøren», «Gniar’n», «Dans på Grasdal» og «Rånny Bruvik» har gledd fleire generasjonar, og får framleis folk til å gaula med på kulturhus og festivalar. Åtte album har det blitt, og tallause framsyningar med tull, tøys, galskap og alvor.
Det heile starta som ei revygruppe i industribygda Salhus nord for Bergen. I ei parodiert form er det dette bygdemiljøet som er bakgrunnen for Vinskvettens tekstunivers, karakterar og elleville historier.
50-årsjubileet skal også feirast med konsertar og «reunion» i Grieghallen i Bergen i desember og januar.
Claus Sellevold (f. 1973) er skodespelar, tekstforfattar og bonde. Han kjem frå Alversund og har vore knytt til ulike teater på Vestlandet. Han er kjend frå oppsetjingar som «Singel & Sand», «Ivar Medaas – Dar kjem dampen» og «Heim til meg».
Knut Arvid Langeland (f. 1958), har vore journalist i Bergens Tidende. han har skrive fleire bøker, mellom anna om heimbygda Salhus. Langeland var sjølv ein del av Vinskvetten frå starten i 1975. Han både song, kora og var tekstforfattar. Frå 1984 har han hatt permisjon frå bandet.
Emner
Det Norske Samlaget er eit kultur- og kunnskapsforlag som gir ut litteratur på nynorsk. Vi gir ut omlag 100 titlar kvart år av norsk og omsett skjønnlitteratur, barne- og ungdomsbøker, dokumentar- og faktalitteratur, ordbøker og læremiddel for høgare utdanning.
