Pressemelding —
Thoralf Fagertun kjem med ny lydserie for barn stappfull av action og slimete romvesen!
I fjor sommar arrangerte Samlaget ein skrivekonkurranse i samarbeid med Fabel. Dei var på jakt etter kandidatar til sine nye lydsatsingar, og no er vinnarbidraget endeleg klart!
158 forfattarar kjempa om å bli Samlaget og Fabel sin ny lydserieforfattar i fjor. Barnebokforfattar Thoralf Fagertun enda til slutt opp med å ta førstepremien i konkurransen. No er han aktuell med ein actionfylt lydserie for barn, Gode råd for å redde romvesen.
For ei veke sidan hadde Theo aldri høyrt om planeten Nox. Men det var før kompisen Bompi fekk uventa besøk. No må Theo rømme frå blodtørstige romvesen og samtidig redde skapningane på Nox frå grådige gruvefolk. Men med hjelp frå robothunden Kim kan det vel ikkje gå gale?
Gode råd for å redde romvesen er ein fartsfylt og fargerik spenningsserie for barn mellom 9 og 12 år. Serien er delt opp i fem episodar stappfulle av action, humor, bedøvingspistolar og glupske romvesen.
Thoralf Fagertun (f. 1980) kjem frå Meløy i Nordland og debuterte i 2022 med den morosame barneromanen Familien Gnork, som han mellom anna vart nominert til debutantprisen Trollkrittet for. I 2024 gav han ut barneboka Kobbs hus. Fagertun er utdanna litteraturvitar, jobbar med litteraturformidling og har gått forfattarutdanninga ved Norsk barnebokinstitutt. I 2025 vann han Samlaget og Fabel sin skrivekonkurranse for lyd og fekk 100 000 kroner i skrivestipend og ein utviklingsavtale for bidraget sitt.
Relaterte lenker
Emner
Regions
Det Norske Samlaget er eit kultur- og kunnskapsforlag som gir ut litteratur på nynorsk. Vi gir ut omlag 100 titlar kvart år av norsk og omsett skjønnlitteratur, barne- og ungdomsbøker, dokumentar- og faktalitteratur, ordbøker og læremiddel for høgare utdanning.
